రాయలసీమ న్యూస్, తిరుపతి: తిరుపతి జిల్లా ఎస్పీ ఎల్. సుబ్బరాయుడు, ఐపీఎస్ ఆదేశాల మేరకు జిల్లాలోని సున్నిత, హైపర్ సెన్సిటివ్ గ్రామాల్లో శాంతిభద్రతల పరిస్థితిని పర్యవేక్షించేందుకు పోలీసు శాఖ ప్రత్యేక చర్యలు చేపట్టింది. ఈ క్రమంలో “పల్లె నిద్ర” కార్యక్రమం ద్వారా గ్రామాల్లో రాత్రి బస చేస్తూ స్థానిక పరిస్థితులను ప్రత్యక్షంగా పరిశీలిస్తున్నారు.
జిల్లా వ్యాప్తంగా పోలీసు అధికారులు, సిబ్బంది హైపర్ సెన్సిటివ్గా గుర్తించిన గ్రామాల్లో రాత్రి పర్యటిస్తూ ప్రజలతో మమేకమవుతున్నారు. గ్రామస్తులతో నేరుగా మాట్లాడి వారి సమస్యలను తెలుసుకోవడంతో పాటు, ఎన్నికల సమయంలో పాటించాల్సిన నిబంధనలు, తీసుకోవాల్సిన జాగ్రత్తలపై అవగాహన కల్పిస్తున్నారు.
పాకాల పోలీస్ స్టేషన్ పరిధిలోని హైపర్ సెన్సిటివ్ గ్రామమైన వల్లివేడు గ్రామంలో పాకాల పోలీస్ ఇన్స్పెక్టర్ ఆధ్వర్యంలో పోలీసు సిబ్బంది “పల్లె నిద్ర” కార్యక్రమం నిర్వహించారు. గ్రామంలో రాత్రి బస చేసిన అధికారులు, సిబ్బంది శాంతిభద్రతల పరిస్థితిని సమీక్షించి, స్థానిక ప్రజలతో సమావేశమయ్యారు.
ఎన్నికల నేపథ్యంలో గ్రామంలో ఎలాంటి ఉద్రిక్తతలు తలెత్తకుండా ముందస్తు చర్యలు తీసుకోవాల్సిన అవసరాన్ని అధికారులు ప్రజలకు వివరించారు. ఎన్నికల నిబంధనలను స్పష్టంగా తెలియజేసి, ప్రశాంత వాతావరణంలో ఎన్నికలు జరగేందుకు ప్రతి ఒక్కరూ బాధ్యతాయుతంగా వ్యవహరించాలని సూచించారు.
ఎన్నికల సమయంలో ఎలాంటి అవాంఛనీయ ఘటనలకు తావు లేకుండా ఉండేందుకు ప్రజలు అప్రమత్తంగా ఉండాలని, అనుమానాస్పద కార్యకలాపాలు గానీ, శాంతిభద్రతలకు విఘాతం కలిగించే అంశాలు గానీ గమనించిన వెంటనే సమీప పోలీస్ స్టేషన్కు సమాచారం అందించాలని అధికారులు సూచించారు.
గ్రామస్తులకు భద్రతపై భరోసా కల్పిస్తూ, ప్రశాంతమైన ఎన్నికల నిర్వహణకు పోలీసు శాఖ అన్ని విధాలా సిద్ధంగా ఉందని, అవసరమైన చోట అదనపు బలగాలను కూడా వినియోగించేందుకు ఏర్పాట్లు చేసినట్లు అధికారులు తెలిపారు. హైపర్ సెన్సిటివ్ గ్రామాల్లో నిరంతర గస్తీ, పర్యవేక్షణ కొనసాగుతుందని స్పష్టం చేశారు.
ఎన్నికల సమయంలో చట్టాన్ని తమ చేతుల్లోకి తీసుకోవాలనే ప్రయత్నాలు సహించబోమని, నిబంధనలు ఉల్లంఘించే వారిపై కఠిన చర్యలు తప్పవని పోలీసు అధికారులు గ్రామస్తులకు హెచ్చరించారు. ప్రజల సహకారంతోనే శాంతియుత వాతావరణంలో ఎన్నికలు విజయవంతంగా నిర్వహించగలమని వారు పేర్కొన్నారు.
