రాయలసీమ న్యూస్, తిరుపతి: తిరుపతి జిల్లా రైల్వే కోడూరు టౌన్ పరిధిలో గంజాయి వినియోగం, అక్రమ విక్రయాలు, సరఫరాపై పోలీసు శాఖ ప్రత్యేక నిఘా కొనసాగిస్తోంది. మాదకద్రవ్యాల వినియోగాన్ని అరికట్టేందుకు భాగంగా పోలీసులు మంగళవారం విస్తృత తనిఖీలు నిర్వహించారు.
తిరుపతి జిల్లా ఎస్పీ ఎల్. సుబ్బరాయుడు, ఐపీఎస్ ఆదేశాల మేరకు, రేణిగుంట డీఎస్పీ వై. శ్రీనివాసరావు పర్యవేక్షణలో, రైల్వే కోడూరు సీఐ చంద్రశేఖర్ ఆధ్వర్యంలో ఈ ప్రత్యేక చర్యలు చేపట్టారు. రైల్వే కోడూరు టౌన్లో గంజాయి వినియోగంపై దృష్టి సారించి పోలీసులు తనిఖీలు నిర్వహించారు.
ఈ క్రమంలో చిట్వేల్ రోడ్లోని హాస్పిటల్ సమీపంలో గంజాయి టెస్ట్ కిట్లను ఉపయోగించి మొత్తం 210 మందికి గంజాయి పరీక్షలు చేశారు. మాదకద్రవ్యాల వినియోగాన్ని గుర్తించి, తద్వారా నియంత్రించేందుకు ఈ పరీక్షలు నిర్వహించినట్లు పోలీసులు తెలిపారు.
గంజాయి సరఫరా వ్యవస్థపై ప్రత్యేక నిఘా కొనసాగిస్తూ, వినియోగం, విక్రయాలకు సంబంధించిన సమాచారాన్ని సేకరించేందుకు పోలీసు సమాచారదారుల వ్యవస్థను మరింత బలోపేతం చేశారు. గంజాయి సరఫరా చేసే వ్యక్తులు, విక్రయదారులు, వినియోగదారుల కదలికలపై నిఘా పెంచినట్లు అధికారులు పేర్కొన్నారు.
ప్రజలు గంజాయి మరియు ఇతర మాదకద్రవ్యాల వినియోగం, విక్రయం, సరఫరాకు సంబంధించిన సమాచారాన్ని పోలీసులకు తెలియజేసి సహకరించాలని పోలీసులు విజ్ఞప్తి చేశారు. సమాచారం అందించే వారి వివరాలను పూర్తిగా గోప్యంగా ఉంచుతామని స్పష్టం చేశారు.
యువత, విద్యార్థులు మాదకద్రవ్యాలకు దూరంగా ఉండాల్సిన అవసరాన్ని అధికారులు ప్రస్తావించారు. మాదకద్రవ్యాల వినియోగం వల్ల కలిగే తీవ్రమైన అనర్థాలపై అవగాహన కల్పించేందుకు పోలీసు శాఖ ఆధ్వర్యంలో నిరంతరం అవగాహన కార్యక్రమాలు, ప్రత్యేక తనిఖీలు నిర్వహిస్తున్నట్లు తెలిపారు.
గంజాయి, ఇతర మాదకద్రవ్యాల వినియోగం, విక్రయం, అక్రమ సరఫరాకు పాల్పడే వారిపై చట్ట ప్రకారం కఠిన చర్యలు తప్పవని పోలీసులు హెచ్చరించారు. మాదకద్రవ్య రహిత సమాజ నిర్మాణానికి ప్రజలు పోలీసు శాఖకు పూర్తి స్థాయిలో సహకరించాలని కోరారు.
