రాయలసీమ న్యూస్, తిరుపతి: రేణిగుంట: రేణిగుంట శాఖా గ్రంథాలయాన్ని ఉమ్మడి చిత్తూరు జిల్లా గ్రంథాలయ సంస్థ చైర్మన్ డాక్టర్ రెడ్డివారి గురువారెడ్డి గురువారం ఆకస్మికంగా పరిశీలించారు. గ్రంథాలయంలోని రికార్డులు, పుస్తకాల నిల్వ, గ్రంథాలయ యాప్ పనితీరును సమీక్షించి పాఠకులతో మాట్లాడారు.
గ్రంథాలయంలో ప్రస్తుతం సుమారు 17 వేల పుస్తకాలు అందుబాటులో ఉన్నాయని, పోటీ పరీక్షలకు అవసరమైన పుస్తకాలు కూడా ఉన్నాయని ఆయన తెలిపారు. విద్యార్థుల అవసరాలను దృష్టిలో ఉంచుకుని మరిన్ని పుస్తకాలను సమకూర్చేలా అధికారులను ఆదేశించారు.
తిరుపతి నుంచి అవసరమైన అదనపు పుస్తకాలను తీసుకువచ్చి రేణిగుంట శాఖా గ్రంథాలయంలో విద్యార్థులకు అందుబాటులో ఉంచాలని సంబంధిత అధికారులకు సూచించారు. ఈ మేరకు పుస్తకాల జాబితాను సిద్ధం చేసి, త్వరితగతిన పంపిణీ చేయాలని సూచించినట్లు సమాచారం.
గ్రంథాలయ యాప్ వినియోగంపై కూడా ఆయన ప్రత్యేకంగా దృష్టి సారించారు. పాఠకులు, విద్యార్థులు గ్రంథాలయ యాప్ను సద్వినియోగం చేసుకుని, అందుబాటులో ఉన్న పుస్తకాల వివరాలు, సేవలను తెలుసుకుని ఉపయోగించుకోవాలని కోరారు.
ఈ సందర్భంగా గ్రంథాలయ నిర్వహణ, పాఠకుల హాజరు, పుస్తకాల వినియోగంపై కూడా చైర్మన్ విచారణ జరిపినట్లు గ్రంథాలయ వర్గాలు తెలిపాయి. శాఖా గ్రంథాలయాన్ని మరింత అభివృద్ధి చేయడానికి అవసరమైన చర్యలను తీసుకుంటామని అధికారులు పేర్కొన్నారు.
కార్యక్రమంలో గ్రంథాలయ అధికారి నాగరాణి పాల్గొన్నారు. స్థానిక పాఠకులు, విద్యార్థులు కూడా గ్రంథాలయ తనిఖీ సందర్భంగా అక్కడే ఉన్నారు.
