రాయలసీమ న్యూస్, తిరుపతి: తొట్టంబేడు మండల పరిధిలో దైవ దర్శనానికి బయలుదేరిన భక్తుల వాహనం రోడ్డు ప్రమాదానికి గురై ఒకరు మృతి చెందగా, ఐదుగురు తీవ్రంగా గాయపడ్డారు. రేణిగుంట–నాయుడుపేట జాతీయ రహదారిపై పెద్దకన్నలి సమీపంలో గురువారం తెల్లవారుజామున ఈ ప్రమాదం జరిగింది.
శ్రీకాళహస్తి టూటౌన్ సీఐ నాగరాజు అందించిన వివరాల ప్రకారం, ప్రకాశం జిల్లా చీమకుర్తికి చెందిన సుబ్రహ్మణ్యం (67) కుటుంబ సభ్యులతో కలిసి తిరుమల దైవ దర్శనానికి బయలుదేరారు. మొత్తం తొమ్మిది మంది కుటుంబ సభ్యులతో కలిసి తుపాన్ వాహనంలో ప్రయాణం ప్రారంభించారు.
గురువారం పెద్దకన్నలి సమీపంలో రేణిగుంట–నాయుడుపేట జాతీయ రహదారిపై ప్రయాణిస్తుండగా, భక్తులతో వెళ్తున్న తుపాన్ వాహనం ముందువైపు వెళ్తున్న లారీని ఢీకొట్టింది. ఢీకొన్న ప్రభావంతో వాహనం ముందుభాగం తీవ్రంగా దెబ్బతింది.
ఈ ప్రమాదంలో సుబ్రహ్మణ్యం ఘటనా స్థలంలోనే మృతి చెందారు. అతని కుటుంబ సభ్యుల్లో నలుగురు, వాహన డ్రైవర్ తీవ్రంగా గాయపడ్డారు. మిగిలిన ప్రయాణికులకు స్వల్ప గాయాలు అయ్యాయి. ప్రమాదం సమయంలో డ్రైవర్తో కలిపి వాహనంలో మొత్తం 10 మంది ఉన్నట్లు పోలీసులు తెలిపారు.
సమాచారం అందుకున్న వెంటనే పోలీసులు సంఘటనా స్థలానికి చేరుకుని రక్షణ చర్యలు చేపట్టారు. క్షతగాత్రులను వెంటనే శ్రీకాళహస్తి ప్రాంతీయ ఆసుపత్రికి తరలించి చికిత్స అందిస్తున్నారు. మృతదేహాన్ని పోస్టుమార్టం నిమిత్తం అదే ఆసుపత్రికి తరలించారు.
బాధితుల ఫిర్యాదు మేరకు వాహన డ్రైవర్ బ్రహ్మపై కేసు నమోదు చేసి దర్యాప్తు ప్రారంభించినట్లు సీఐ నాగరాజు తెలిపారు. ప్రమాదానికి గల కారణాలపై పోలీసులు విచారణ కొనసాగిస్తున్నారు. రహదారిపై కొంతసేపు ట్రాఫిక్కు అంతరాయం కలిగినప్పటికీ, అనంతరం వాహనాలను పక్కకు తరలించడంతో రాకపోకలు సాధారణ స్థితికి చేరుకున్నాయి.
