రాయలసీమ న్యూస్, వై.యస్.ఆర్: బ్రహ్మంగారిమఠం, ఆగస్టు 14: కోట్లాది రూపాయలు వెచ్చించి నిర్మించిన భవనాల్లో పారిశుధ్య లోపం తలెత్తిన ఘటన బ్రహ్మంగారిమఠం మండలంలో వెలుగుచూసింది. మండల పరిధిలోని బి.ఆర్. అంబేద్కర్ గురుకుల పాఠశాలలో అధికారులు ఆకస్మిక తనిఖీ నిర్వహించగా, అక్కడ నెలకొన్న అధ్వాన్న పరిస్థితులు చూసి విస్తుపోయారు. విద్యార్థుల ప్రాణాలతో ఆటలాడుతున్న పాఠశాల సిబ్బందిపై అధికారులు తీవ్ర ఆగ్రహం వ్యక్తం చేశారు.
గురువారం మధ్యాహ్నం 12:30 గంటల సమయంలో మండల ఎంపీపీ వీరనారాయణరెడ్డి, ఐడీఎల్ డివిజనల్ డిప్యూటీ డీఎంహెచ్ఓ డాక్టర్ మల్లేష్ సంయుక్తంగా ఈ గురుకుల పాఠశాలను సందర్శించి తనిఖీలు చేపట్టారు. ఆ సమయంలో విద్యార్థులు మధ్యాహ్న భోజనం చేస్తుండగా, వారు తినే ఆహారం చుట్టూ ఈగలు గుంపులుగా తిరుగుతున్న దృశ్యం అధికారులు గమనించారు. డైనింగ్ హాల్ అంతా అసహ్యకరమైన దుర్వాసనతో నిండిపోవడంతో వారు ఒక్కసారిగా దిగ్భ్రాంతికి గురయ్యారు.
పాఠశాలలో నెలకొన్న అపరిశుభ్ర వాతావరణం చూసి ఎంపీపీ వీరనారాయణరెడ్డి తీవ్ర అసంతృప్తి వ్యక్తం చేశారు. వెంటనే ప్రిన్సిపాల్ పరమేశ్వరుడు, ఇతర సిబ్బందిని పిలిపించి గట్టిగా మందలించారు.
“మీరు ఎక్కడ పనిచేసినా మీ తీరు మారదా?”
అని ఎంపీపీ వీరనారాయణరెడ్డి ప్రశ్నించినట్లు సమాచారం. విద్యార్థుల ప్రాణాలతో చెలగాటం ఆడితే సహించేది లేదని ఆయన హెచ్చరించినట్లు పేర్కొన్నారు. తక్షణమే డైనింగ్ హాలును పూర్తిగా శుభ్రపరచాలని, విద్యార్థులకు నాణ్యమైన, పరిశుభ్రమైన ఆహారాన్ని మాత్రమే అందించాలని సంబంధిత సిబ్బందికి ఆయన ఆదేశాలు జారీ చేశారు.
తనిఖీ అనంతరం ఎంపీపీ వీరనారాయణరెడ్డి జిల్లా స్థాయి సంబంధిత ఉన్నతాధికారితో ఫోన్ ద్వారా మాట్లాడి, పాఠశాలలో నెలకొన్న దుస్థితిని వివరించారు. విద్యార్థుల ఆరోగ్య భద్రతను నిర్లక్ష్యం చేసిన బాధ్యులపై తక్షణమే శాఖాపరమైన కఠిన చర్యలు తీసుకోవాలని ఆయన కోరారు.
కోట్లాది రూపాయల వ్యయంతో నిర్మించిన భవనాల్లో విద్యార్థుల ఆరోగ్య భద్రతను గాలికి వదిలేయడంపై విద్యార్థుల తల్లిదండ్రులు, స్థానికులు తీవ్ర ఆగ్రహం వ్యక్తం చేస్తున్నారు. ఇలాంటి నిర్లక్ష్యానికి బాధ్యులైన వారిని వదిలిపెట్టకూడదని, ఇప్పటికైనా ఉన్నతాధికారులు స్పందించి కఠిన చర్యలు తీసుకోవాలని వారు డిమాండ్ చేస్తున్నారు.
