రాయలసీమ న్యూస్, వై.యస్.ఆర్: జమ్మలమడుగు మండలం గూడెం చెరువు గ్రామంలోని రాజీవ్ కాలనీలో దీన జన సేవా సమితి – జ్యోతి మనోవికాస కేంద్రం 22వ వార్షికోత్సవాన్ని నిర్వహించారు. ఈ సందర్భంగా దివ్యాంగుల కోసం ఏర్పాటు చేసిన ట్రై సైకిళ్లు, సంక కర్రలు, వినికిడి యంత్రాలు, పాదరక్షలు తదితర సహాయక పరికరాలను పంపిణీ చేశారు.
దివ్యాంగులకు ఆత్మవిశ్వాసం, స్వావలంబన, గౌరవప్రదమైన జీవితం అందించేందుకు సంస్థ చేస్తున్న కృషి స్ఫూర్తిదాయకమని కార్యక్రమంలో పాల్గొన్న నాయకులు అభిప్రాయపడ్డారు. సమాజంలోని ప్రతి ఒక్కరూ దివ్యాంగుల పట్ల సానుభూతితో మాత్రమే కాకుండా సమానత్వం, గౌరవం, సహకారంతో ముందుకు సాగాలని వారు పేర్కొన్నారు.
సేవా కార్యక్రమాలు మరింత విస్తరించి, ప్రతి దివ్యాంగుడి జీవితంలో వెలుగు నింపేలా ప్రయత్నాలు కొనసాగాలని నాయకులు ఆకాంక్షించారు. దివ్యాంగుల అవసరాలకు అనుగుణంగా సహాయక పరికరాలు అందించడం ద్వారా వారు స్వయం సమృద్ధి సాధించేలా చూడాలని సూచించారు.
ఈ కార్యక్రమంలో భాగంగా భూపేష్ రెడ్డి 20వేల రూపాయల ఆర్థిక సాయం అందించారు. అనంతరం చెట్లు నాటే కార్యక్రమాన్ని కూడా నిర్వహించారు. పర్యావరణ పరిరక్షణతో పాటు సేవా కార్యక్రమాలు సమాంతరంగా సాగాలని నిర్వాహకులు తెలిపారు.
జమ్మలమడుగు నియోజకవర్గం మార్కెట్ యార్డ్ చైర్మన్ ఎస్ నాగేశ్వర రెడ్డి, టీడీపీ సీనియర్ నాయకులు జంబాపురం రమణారెడ్డి, జిల్లా ఉపాధ్యక్షులు శ్రీనివాసులు, మార్కెట్ యార్డ్ వైస్ చైర్మన్ మల్లికార్జున, ఎస్సీ సెల్ రాష్ట్ర కార్యదర్శి చదిపిరాళ్ళ రమేష్ రెడ్డి, గ్రామ ముఖ్య నాయకులు, కార్యకర్తలు తదితరులు ఈ కార్యక్రమంలో పాల్గొన్నారు.
