రాయలసీమ న్యూస్, వై.యస్.ఆర్: కడప: కడప నగరంలోని వై జంక్షన్ వద్ద ఉన్న డాక్టర్ బి.ఆర్. అంబేద్కర్ భవనం పూర్తిగా శిథిలావస్థకు చేరడంతో, ప్రస్తుత నిర్మాణాన్ని తొలగించి అదే స్థలంలో ఆధునిక సౌకర్యాలతో నూతన భవనాన్ని నిర్మించాలని అంబేద్కర్ భవన్ పరిరక్షణ వేదిక నాయకులు డిమాండ్ చేశారు. ఈ మేరకు మంగళవారం కడప ఎంపీ క్యాంపు కార్యాలయంలో ఎంపీ వైఎస్ అవినాష్ రెడ్డి కి పరిరక్షణ వేదిక ప్రతినిధులు వినతిపత్రాన్ని సమర్పించారు.
వేదిక నాయకులు జాల జయవర్ధన్, సగిలి గురప్ప, కన్నెలూరు శంకర్, అంజి, గోపి తదితరులు మాట్లాడుతూ, వై జంక్షన్ వద్ద డాక్టర్ బి.ఆర్. అంబేద్కర్ పేరుతో నిర్మించిన ఈ భవనం ప్రస్తుతం పూర్తిగా శిథిలావస్థకు చేరి ప్రమాదకరంగా మారిందని ఆవేదన వ్యక్తం చేశారు. వేలాది మంది విద్యార్థులు, యువత, సామాజిక సంఘాల ప్రతినిధులకు ఉపయోగపడాల్సిన ఈ భవనం, సరైన నిర్వహణ లోపంతో నేడు నిరుపయోగంగా మారిందని వారు పేర్కొన్నారు.
భవనానికి తాత్కాలిక మరమ్మతులు చేయడం వల్ల ప్రయోజనం ఉండదని, ప్రస్తుత నిర్మాణాన్ని పూర్తిగా తొలగించి అదే ప్రదేశంలో అత్యాధునిక వసతులతో నూతన అంబేద్కర్ భవనాన్ని నిర్మించాలని నాయకులు కోరారు. కొత్త భవనంలో గ్రంథాలయం, సమావేశ మందిరం, శిక్షణ కేంద్రం ఏర్పాటు చేయడంతో పాటు నిరుద్యోగ యువత కోసం ప్రత్యేక స్టడీ సర్కిల్ ఏర్పాటు చేయాలని విజ్ఞప్తి చేశారు.
ఈ విషయంలో ప్రభుత్వం, జిల్లా యంత్రాంగం, సాంఘిక సంక్షేమ శాఖ అధికారులు తక్షణం స్పందించి చర్యలు చేపట్టాలని వేదిక ప్రతినిధులు కోరారు. డిమాండ్పై స్పందన రాకపోతే దళిత సంఘాలు, ఇతర సామాజిక సంఘాలతో కలిసి ఉద్యమానికి దిగుతామని హెచ్చరించారు.
వినతిపత్రాన్ని స్వీకరించిన కడప ఎంపీ వైఎస్ అవినాష్ రెడ్డి పరిరక్షణ వేదిక ప్రతినిధుల అభ్యర్థనపై సానుకూలంగా స్పందించారు. శిథిలావస్థలో ఉన్న అంబేద్కర్ భవన పునర్నిర్మాణం కోసం తన వంతు పూర్తి సహకారం అందిస్తానని హామీ ఇచ్చారు.
శిథిలావస్థలో ఉన్న అంబేద్కర్ భవన పునర్నిర్మాణం కోసం నా వంతు పూర్తి సహకారం అందిస్తాను. వైఎస్సార్సీపీ అధినేత వైఎస్ జగన్ మోహన్ రెడ్డి ఆశీస్సులతో భవన నిర్మాణానికి శాయశక్తులా కృషి చేస్తాను. ఈ సమస్య పరిష్కారం కోసం సాగే పోరాటంలో నేను కూడా భాగస్వామిగా ఉంటాను.
అంబేద్కర్ భవన్ పరిరక్షణ వేదిక ప్రతినిధులు సమర్పించిన వినతిపత్రంపై ఎంపీ స్పందనతో, కడప వై జంక్షన్లో నూతన అంబేద్కర్ భవనం నిర్మాణంపై స్థానిక దళిత, సామాజిక సంఘాల్లో ఆశలు పెరిగాయి.
