రాయలసీమ న్యూస్, వై.యస్.ఆర్: కడప జిల్లా ఎర్రగుంట్లలో సోమవారం రాత్రి జరిగిన రోడ్డు ప్రమాదంలో మహిళ మృతి చెందగా, ఆమె భర్త తీవ్రంగా గాయపడ్డాడు. ఎర్రగుంట్లలోని SV కళ్యాణ మండపం సమీపంలో బైక్, ఆటో ఒకదానికొకటి ఢీకొనడంతో ఈ దుర్ఘటన చోటుచేసుకుంది.
పోలీసులు తెలిపిన వివరాల ప్రకారం, వినాయక్నగర్కు చెందిన సుబ్రహ్మణ్యం (42), ఆయన భార్య శివ నిర్మల (40) పొద్దుటూరు నుంచి ఎర్రగుంట్లకు బైక్పై వెళ్తుండగా ప్రమాదం జరిగింది. ఎదురుగా వచ్చిన ఆటో బైక్ను ఢీకొనడంతో ఇద్దరూ రోడ్డుపై పడిపోయారు.
ఈ ప్రమాదంలో శివ నిర్మల అక్కడికక్కడే మృతి చెందింది. సుబ్రహ్మణ్యం తీవ్రంగా గాయపడడంతో అక్కడికి చేరుకున్న 108 అంబులెన్స్ సిబ్బంది అతన్ని పొద్దుటూరు ప్రభుత్వ ఆసుపత్రికి తరలించారు.
అయితే ఆసుపత్రిలో చికిత్స పొందుతున్న సుబ్రహ్మణ్యం పరిస్థితి విషమించడంతో వైద్యుల సూచన మేరకు కర్నూలుకు తరలించినట్లు సమాచారం. ప్రమాదం జరిగిన వెంటనే ఎర్రగుంట్ల పోలీసులు సంఘటనా స్థలానికి చేరుకుని పరిశీలించారు.
ప్రమాదానికి కారణాలపై పోలీసులు దర్యాప్తు ప్రారంభించారు. ఆటో డ్రైవర్ నిర్లక్ష్యంగా నడపడం వల్లే ప్రమాదం జరిగిందా, లేక ఇతర కారణాలున్నాయా అనే కోణంలో విచారణ కొనసాగిస్తున్నారు. కేసు నమోదు చేసి, తదుపరి చర్యలు చేపట్టినట్లు పోలీసులు తెలిపారు.
శివ నిర్మల మృతి వార్త తెలిసి వినాయక్నగర్లో విషాదం నెలకొంది. స్థానికులు ప్రమాద స్థలానికి చేరుకుని పరిస్థితిని పరిశీలించారు. రాత్రి వేళల్లో రహదారిపై వాహనాలు జాగ్రత్తగా నడపాలని, ట్రాఫిక్ నియమాలు పాటించాలని పోలీసులు ప్రజలకు విజ్ఞప్తి చేస్తున్నారు.
