రాయలసీమ న్యూస్, వై.యస్.ఆర్: కడప : బంగారు ఆభరణాలపై నకిలీ హాల్మార్క్ ముద్రలు వేస్తున్న పెద్ద స్థాయి అక్రమ వ్యవహారం కడప నగరంలో బహిర్గతమైంది. బ్యూరో ఆఫ్ ఇండియన్ స్టాండర్డ్స్ (BIS) విజయవాడ బ్రాంచ్ అధికారులు నిర్వహించిన ప్రత్యేక సోదాల్లో ఈ రాకెట్ బయటపడింది.
కడప నగరంలోని టీకేఎం వీధిలో ఉన్న కేఎన్ఆర్ హాల్మార్కింగ్ అండ్ అసెయింగ్ సెంటర్పై బుధవారం అధికారులు ఆకస్మిక తనిఖీలు చేపట్టారు. ఈ దాడుల్లో తప్పనిసరిగా ఉండాల్సిన హాల్మార్క్ యూనిక్ ఐడెంటిఫికేషన్ (HUID) లేకుండా ఉన్న బంగారు ఆభరణాలు, నకిలీ BIS గుర్తులు ముద్రించే లేజర్ మార్కింగ్ యంత్రం అధికారులు స్వాధీనం చేసుకున్నారు.
సోదాల్లో మొత్తం 72.71 గ్రాముల బంగారు ఆభరణాలు లభించాయి. వాటిపై HUID లేకపోవడంతో పాటు BIS లోగో, బంగారం స్వచ్ఛతను సూచించే నకిలీ ముద్రలు ఉన్నట్లు అధికారులు గుర్తించారు. నకిలీ ముద్రల కోసం ఉపయోగిస్తున్న లేజర్ మార్కింగ్ యంత్రం, కంప్యూటర్, పెన్డ్రైవ్లను కూడా అధికారులు సీజ్ చేశారు.
ఈ తనిఖీలను BIS జాయింట్ డైరెక్టర్ షణ్ముఖ శివ పల్లి, టి.అరుణ్, డిప్యూటీ డైరెక్టర్ దుర్గం వివేక్వర్ధన్రెడ్డి ఆధ్వర్యంలో నిర్వహించారు. హాల్మార్కింగ్ నిబంధనలను ఉల్లంఘించిన కేఎన్ఆర్ హాల్మార్కింగ్ అండ్ అసెయింగ్ సెంటర్పై BIS చట్టంలోని సెక్షన్ 29 కింద చర్యలు ప్రారంభించినట్లు విజయవాడ బ్రాంచ్ డైరెక్టర్, హెడ్ ప్రేమ్ సజాని పట్నాలా తెలిపారు.
సంబంధిత చట్టపరమైన నిబంధనల ప్రకారం, సెక్షన్ 14(6) కింద మొదటి ఉల్లంఘనకు కనీసం రూ.లక్షకు తగ్గకుండా జరిమానా విధించే అవకాశం ఉందని అధికారులు వివరించారు. నేర తీవ్రతను బట్టి ఏడాది వరకు జైలు శిక్ష పడే అవకాశం కూడా ఉందని పేర్కొన్నారు.
బంగారం కొనుగోలు సమయంలో వినియోగదారులు తప్పనిసరిగా హాల్మార్క్ వివరాలు పరిశీలించాలని BIS అధికారులు సూచించారు. ముఖ్యంగా ‘BIS Care App’ ద్వారా HUID నంబర్, BIS లోగోను చెక్ చేసుకోవడం ద్వారా నకిలీ ముద్రల నుంచి రక్షణ పొందవచ్చని అవగాహన కల్పిస్తున్నారు.
నకిలీ హాల్మార్క్ ముద్రలతో వినియోగదారులను మోసం చేసే ప్రయత్నాలను అరికట్టేందుకు రాష్ట్రవ్యాప్తంగా ఇలాంటి తనిఖీలు కొనసాగుతాయని BIS వర్గాలు తెలిపాయి. బంగారం స్వచ్ఛత, హాల్మార్క్ నిబంధనలపై ప్రజల్లో అవగాహన పెంచే దిశగా ప్రత్యేక ప్రచార కార్యక్రమాలు కూడా చేపడుతున్నట్లు సమాచారం.
