రాయలసీమ న్యూస్, వై.యస్.ఆర్: కడప: జిల్లా వ్యాప్తంగా నేరాల నియంత్రణ, అసాంఘిక కార్యకలాపాల అరికట్టడం, ప్రజల్లో భద్రతాభావాన్ని పెంపొందించడం లక్ష్యంగా కడప జిల్లా పోలీసులు ప్రతి రోజు విస్తృతంగా నైట్ పెట్రోలింగ్ నిర్వహిస్తున్నారు. రాత్రి వేళల్లో ప్రధాన రహదారులు, కాలనీలు, వాణిజ్య ప్రాంతాలు, నివాస ప్రాంతాల్లో పోలీసులు పర్యటిస్తూ పరిస్థితులను సమీక్షిస్తున్నారు.
తాళాలు వేసి ఖాళీగా ఉన్న ఇళ్ల వద్ద ప్రత్యేక నిఘా ఏర్పాటు చేస్తున్నారు. ఇలాంటి ఇళ్ల చుట్టుపక్కల అనుమానాస్పదంగా తిరుగుతున్న వ్యక్తులపై పోలీసులు ప్రత్యేక దృష్టి పెట్టారు. పాత నేరస్తుల కదలికలపై కూడా పర్యవేక్షణ కొనసాగిస్తూ, వారి కార్యకలాపాలపై సమాచారం సేకరిస్తున్నారు.
నేరాల నియంత్రణలో భాగంగా మొబైల్ చెక్ డివైస్లతో వాహనాల తనిఖీలు చేస్తున్నారు. రాత్రి వేళల్లో ప్రయాణిస్తున్న వాహనాలను ఆపి, డ్రైవర్లు, ప్రయాణికుల వివరాలు నమోదు చేస్తూ, అనుమానాస్పద వస్తువులు, ఆయుధాలు, నిషేధిత పదార్థాలు వంటివి తీసుకెళ్తున్నారా అనే దానిపై కఠినంగా పరిశీలిస్తున్నారు.
అక్రమ కార్యకలాపాలపై నిఘా బిగించేందుకు లాడ్జిల్లో కూడా పోలీసులు తనిఖీలు చేపడుతున్నారు. లాడ్జిల్లో బస చేస్తున్న వారి వివరాలు పరిశీలిస్తూ, గుర్తింపు పత్రాలు ధృవీకరిస్తున్నారు. అనుమానాస్పద వ్యక్తులు, సరైన వివరాలు ఇవ్వని వారిపై ప్రత్యేకంగా విచారణ జరుపుతున్నారు.
జిల్లాలో నేరాల నియంత్రణకు ఈ నైట్ పెట్రోలింగ్, తనిఖీలు ఉపయోగపడుతున్నాయని పోలీసు వర్గాలు భావిస్తున్నాయి. ప్రజలు కూడా రాత్రి వేళల్లో పోలీసులు కనిపించడం వల్ల భద్రతాభావం పెరిగిందని పేర్కొంటున్నారు. నేరాల నియంత్రణ, ప్రజల రక్షణ కోసం ఇలాంటి చర్యలు నిరంతరం కొనసాగుతాయని పోలీసు అధికారులు స్పష్టం చేస్తున్నారు.
