రాయలసీమ న్యూస్, వై.యస్.ఆర్: కడప మునిసిపల్ కార్పొరేషన్ కమిషనర్ డాక్టర్ పి. భవాని ప్రసాద్ గురువారం ఉదయం నగర పరిసర ప్రాంతాల్లోని బండిపల్లి , లింగంపల్లి వద్ద ఉన్న హెడ్ వాటర్ వర్క్స్ ను పరిశీలించారు. తాగునీటి సరఫరా వ్యవస్థ పనితీరును ప్రత్యక్షంగా పరిశీలిస్తూ ఇంజినీరింగ్ విభాగ అధికారులకు పలు సూచనలు చేశారు.
ఈ సందర్భంగా కమిషనర్ కడప నగర ప్రజలకు నిరంతరంగా శుద్ధి, నాణ్యమైన తాగునీటి సరఫరా కొనసాగేందుకు అవసరమైన అన్ని చర్యలు తీసుకోవాలని ఇంజినీరింగ్ అధికారులను ఆదేశించారు. పంపింగ్ వ్యవస్థ, మోటర్లు, పైప్లైన్లు, నీటి నిల్వ సామర్థ్యం వంటి కీలక వసతులన్నింటిని నిరంతరం పర్యవేక్షిస్తూ ఎలాంటి అంతరాయం లేకుండా నీటి సరఫరా కొనసాగేలా చూడాలని సూచించారు.
నీటి సరఫరా వ్యవస్థలో ఎక్కడైనా లోపాలు, సాంకేతిక సమస్యలు తలెత్తే అవకాశం కనిపించిన వెంటనే తక్షణమే మరమ్మతులు చేపట్టి సమస్యలను పరిష్కరించాలన్నారు. ఇందుకోసం సంబంధిత సాంకేతిక సిబ్బంది ఎప్పటికప్పుడు పరిస్థితిని గమనిస్తూ అప్రమత్తంగా ఉండాలని కమిషనర్ స్పష్టం చేశారు.
తాగునీటి సరఫరా వ్యవస్థపై నిరంతర నిఘా ఉండేలా చర్యలు తీసుకోవాలని సంబంధిత అధికారులకు కమిషనర్ స్పష్టమైన ఆదేశాలు జారీ చేశారు. నగర ప్రజలకు తాగునీటి సరఫరాలో ఎలాంటి అసౌకర్యం కలగకుండా ముందస్తు చర్యలు, జాగ్రత్తలు తీసుకోవాలని ఆయన సూచించారు.
హెడ్ వాటర్ వర్క్స్ వద్ద పంపింగ్ యంత్రాలు, మోటర్లు, ప్రధాన పైప్లైన్లు, నిల్వ ట్యాంకులు, ఇతర అనుబంధ వసతుల పనితీరును కమిషనర్ సమీక్షించారు. నీటి నిల్వ సామర్థ్యం, పంపింగ్ సామర్థ్యం, సరఫరా ఒత్తిడి వంటి అంశాలపై అధికారుల నుంచి వివరాలు తెలుసుకున్నారు.
కడప నగరంలో తాగునీటి అవసరాలు పెరుగుతున్న నేపథ్యంలో హెడ్ వాటర్ వర్క్స్ నిర్వహణలో ఎలాంటి నిర్లక్ష్యం చోటుచేసుకోకూడదని కమిషనర్ సంబంధిత అధికారులను హెచ్చరించినట్లు సమాచారం. ప్రజలకు నిరంతర, నాణ్యమైన తాగునీటి సరఫరా మునిసిపల్ కార్పొరేషన్ ప్రాధాన్యతగా తీసుకుంటోందని అధికారులు పేర్కొన్నారు.
