రాయలసీమ న్యూస్, వై.యస్.ఆర్: జిల్లాలో కొనసాగుతున్న ప్రధాన అభివృద్ధి కార్యక్రమాలకు అవసరమైన భూసేకరణ ప్రక్రియను త్వరితగతిన పూర్తి చేయాలని జిల్లా కలెక్టర్ డా. శ్రీధర్ చెరుకూరి సంబంధిత అధికారులను ఆదేశించారు. నీటిపారుదల, జాతీయ రహదారులు, రైల్వే, సౌర విద్యుత్, మురుగునీటి శుద్ధి కేంద్రాలు, ఇతర అభివృద్ధి ప్రాజెక్టులు ప్రతిష్ఠాత్మకంగా కొనసాగుతున్న నేపథ్యంలో భూసేకరణలో ఎలాంటి ఆలస్యం చోటు చేసుకోకూడదని ఆయన స్పష్టం చేశారు.
సోమవారం కలెక్టరేట్ బోర్డు మీటింగ్ హాలు నుంచి వీడియో కాన్ఫరెన్స్ ద్వారా జిల్లా కలెక్టర్ డా. శ్రీధర్ చెరుకూరి జిల్లాలో వివిధ అభివృద్ధి ప్రాజెక్టులకు సంబంధించిన రెవెన్యూ అంశాలు, భూసేకరణ పురోగతిని సమీక్షించారు. ప్రతి ప్రాజెక్టు స్థితిగతులపై విభాగాల వారీగా వివరాలు తెలుసుకున్నారు.
ఈ సమీక్ష సమావేశంలో జాయింట్ కలెక్టర్ డా. నిధి మీనా, రాజంపేట సబ్ కలెక్టర్ హెచ్.ఎస్. భావన, డీఆర్వో మల్లికార్జునుడు, ఆర్డీవోలు, సంబంధిత ప్రాజెక్టుల డిప్యూటీ కలెక్టర్లు పాల్గొన్నారు. మండలాల వారీగా భూసేకరణ దశలు, పెండింగ్లో ఉన్న కేసులు, పరిహారం చెల్లింపుల స్థితిపై అధికారులు కలెక్టర్కు నివేదికలు సమర్పించారు.
ఈ సందర్భంగా జిల్లా కలెక్టర్ మాట్లాడుతూ, ప్రాజెక్టుల పురోగతిలో భూసేకరణ కీలక పాత్ర పోషిస్తుందని, దీనిలో జాప్యం జరిగితే పనులన్నీ నిలిచిపోతాయని అధికారులకు గుర్తుచేశారు. పెండింగ్లో ఉన్న అవార్డులు, పరిహారం చెల్లింపులు, ప్రతిపాదనలు, భూమి అప్పగింతల ప్రక్రియలను వేగంగా పూర్తి చేయాలని సూచించారు.
జిల్లాలో కొనసాగుతున్న అన్ని ప్రాజెక్టులు అత్యంత ప్రాధాన్యత కలిగినవని, వాటి అమలులో ఆలస్యం జరగకుండా రెవెన్యూ సంబంధిత అన్ని ప్రక్రియలను సమయానికి ముగించాల్సిందిగా కలెక్టర్ ఆదేశించారు. భూసేకరణకు సంబంధించిన ఫైళ్లను కార్యాలయాల్లో నిల్వ ఉంచకుండా, నిర్ణీత గడువుల్లోనే పరిష్కరించేలా చర్యలు తీసుకోవాలని అధికారులకు సూచించారు.
ప్రాజెక్టుల అమలులో ప్రజలతో సమన్వయం, పారదర్శకత అత్యంత అవసరమని, పరిహారం చెల్లింపుల విషయంలో రైతులు, భూస్వాములకు స్పష్టమైన సమాచారం అందేలా చూడాలని కలెక్టర్ సూచించినట్లు సమావేశంలో పాల్గొన్న అధికారులు తెలిపారు. భూసేకరణ, రెవెన్యూ సంబంధిత అంశాలపై తరచూ సమీక్షలు నిర్వహించి, సమస్యలను వెంటనే పరిష్కరించేందుకు చర్యలు కొనసాగించాలని కలెక్టర్ స్పష్టం చేసినట్లు పేర్కొన్నారు.
