రాయలసీమ న్యూస్, వై.యస్.ఆర్: పుట్టినరోజు వేడుకలను కేవలం వినోదానికే పరిమితం చేయకుండా, సమాజానికి ఉపయోగపడేలా సేవా కార్యక్రమాలతో జరుపుకోవడం అభినందనీయమని ప్రొద్దుటూరు రూరల్ సీఐ నాగభూషణం పేర్కొన్నారు. ప్రొఫెటర్ కే. గురువయ్య తన కుమారుడు గురు జస్వంత్ జన్మదినాన్ని పురస్కరించుకుని ప్రజల అత్యవసర వైద్య సేవల కోసం మూడు ఉచిత అంబులెన్స్లను అందుబాటులోకి తీసుకువచ్చారు.
‘జీకే అంబులెన్స్’ పేరుతో ఏర్పాటు చేసిన ఈ ఉచిత సేవలను సోమవారం రాత్రి ప్రొద్దుటూరు రూరల్ పోలీస్ స్టేషన్ పరిధిలో సీఐ నాగభూషణం రిబ్బన్ కట్ చేసి ఘనంగా ప్రారంభించారు. కార్యక్రమానికి స్థానికులు, పోలీసు అధికారులు, సిబ్బంది పెద్ద సంఖ్యలో హాజరయ్యారు.
ఈ సందర్భంగా సీఐ నాగభూషణం మాట్లాడుతూ అత్యవసర సమయాల్లో ప్రాణాలు కాపాడేందుకు అంబులెన్స్ సేవలు ఎంతో కీలకమని అన్నారు. ప్రొద్దుటూరు నుంచి ఆంధ్రప్రదేశ్లోని ఏ ప్రాంతానికైనా అత్యవసర పరిస్థితుల్లో ఈ మూడు అంబులెన్స్లు సేవలు అందిస్తాయని తెలిపారు.
ఈ అంబులెన్స్ సేవలను ఉపయోగించుకునే వారు కేవలం డీజిల్ ఖర్చు, డ్రైవర్ భత్యం (బత్తా) మాత్రమే చెల్లించాల్సి ఉంటుందని, మిగతా సేవలు పూర్తిగా ఉచితంగా అందించనున్నట్లు నిర్వాహకులు పేర్కొన్నారు. ఈ విధంగా ఆర్థికంగా బలహీన స్థితిలో ఉన్నవారికి కూడా అత్యవసర వైద్య సేవలు అందుబాటులోకి రావచ్చని వారు అభిప్రాయపడ్డారు.
ఒక కుటుంబ వేడుకను వందలాది మందికి ఉపయోగపడేలా మార్చడం ద్వారా గురువయ్య కుటుంబం ‘సేవే నిజమైన సంతోషం’ అనే చక్కని సందేశాన్ని చాటిందని పలువురు కొనియాడారు. ప్రమాదాలు, అత్యవసర వైద్య పరిస్థితుల్లో ఆర్థిక ఇబ్బందులతో అంబులెన్స్ సేవలను పొందలేని పేద ప్రజలకు ఈ కార్యక్రమం ఎంతో ఉపయోగకరంగా నిలుస్తుందని సీఐ నాగభూషణం తెలిపారు.
ప్రజలు అత్యవసర సమయాల్లో ఈ ఉచిత అంబులెన్స్ సేవలను సద్వినియోగం చేసుకోవాలని ఆయన కోరారు. అనంతరం గురువయ్య, గురు జస్వంత్లను శాలువాతో సత్కరించి అభినందించారు.
ఈ కార్యక్రమంలో ఎస్ఐలు రాజు, శ్రీకాంత్, ప్రొద్దుటూరు రూరల్ పోలీస్ స్టేషన్ అధికారులు, సిబ్బంది మరియు స్థానికులు పెద్ద సంఖ్యలో పాల్గొన్నారు.
ఉచిత అంబులెన్స్ సేవల కోసం సంప్రదించాల్సిన నంబర్: 6300006493
