రాయలసీమ న్యూస్, వై.యస్.ఆర్: ప్రొద్దుటూరు పట్టణాన్ని పూర్తిగా ప్లాస్టిక్ వినియోగం లేని నగరంగా మార్చడమే తమ లక్ష్యమని ప్రొద్దుటూరు ఎమ్మెల్యే నంద్యాల వరదరాజుల రెడ్డి తెలిపారు. ప్రొద్దుటూరు పురపాలక సంఘం కార్యాలయంలో జరిగిన “స్వచ్ఛ సంకల్ప దీక్ష – ప్లాస్టిక్ రహిత ప్రొద్దుటూరు” అడ్వైజరీ కమిటీ విస్తృత స్థాయి సమీక్షా సమావేశంలో ఆయన పాల్గొన్నారు.
ఈ నెల 15వ తేదీ స్వాతంత్ర దినోత్సవం నాటికి ప్రొద్దుటూరును ప్లాస్టిక్ రహిత ప్రొద్దుటూరుగా మార్చుకోవాలనే లక్ష్యంతో ముందుకు సాగాలని ఎమ్మెల్యే వరదరాజుల రెడ్డి సూచించారు. ఇందుకోసం 15వ తేదీన అనిబిసెంట్ మునిసిపల్ హై స్కూల్ మైదానంలో నిర్వహించనున్న “స్వచ్ఛ సంకల్ప దీక్ష” కార్యక్రమాన్ని విస్తృత స్థాయిలో విజయవంతం చేయాలని పిలుపునిచ్చారు.
“ప్రొద్దుటూరును ప్లాస్టిక్ రహిత ప్రొద్దుటూరుగా మార్చాలనేదే మా లక్ష్యం. ఈ నెల 15వ తేదీ స్వాతంత్ర దినోత్సవం నాటికి ఈ లక్ష్యాన్ని సాధించేందుకు ముందుకు వెళ్లాలి. 15వ తేదీన అనిబిసెంట్ మునిసిపల్ హై స్కూల్ మైదానం నందు నిర్వహించే స్వచ్ఛ సంకల్ప దీక్ష కార్యక్రమాన్ని 10 వేల మందితో నిర్వహించేందుకు ప్రజలందరూ పాల్గొనాలి” అని ఎమ్మెల్యే వరదరాజుల రెడ్డి తెలిపారు.
పట్టణంలో ప్లాస్టిక్ వినియోగాన్ని తగ్గించే దిశగా ప్రజల్లో అవగాహన పెంచేందుకు ఈ దీక్ష కార్యక్రమం కీలకంగా ఉండనుందని సమావేశంలో అధికారులు, ప్రజాప్రతినిధులు అభిప్రాయపడ్డారు. ప్లాస్టిక్ నిషేధంపై కఠిన చర్యలు, ప్రత్యామ్నాయ వినియోగంపై ప్రచారం, పర్యావరణ పరిరక్షణపై ప్రత్యేక కార్యక్రమాలు చేపట్టే అంశాలపై అడ్వైజరీ కమిటీ సమీక్ష జరిపింది.
ఈ సమావేశం, కార్యక్రమంలో మాజీ ఎంపీపీ నంద్యాల రాఘవరెడ్డి, మాజీ ఎమ్మెల్సీ బచ్చల పుల్లయ్య, రాష్ట్ర షైక్ వెల్ఫేర్ అండ్ డెవలప్మెంట్ కార్పొరేషన్ చైర్మన్ & TDP రాష్ట్ర ప్రధాన కార్యదర్శి Vs ముక్తియార్, మున్సిపల్ కమిషనర్ తూతిక శ్రీనివాస్ విశ్వనాథం, రాష్ట్ర వాల్మీకి కార్పొరేషన్ డైరెక్టర్ నల్లబోతుల నాగరాజు, రాష్ట్ర విశ్వ బ్రాహ్మణ సంక్షేమ డైరెక్టర్ శ్రీనివాసాచారి, TDP పట్టణ అధ్యక్షుడు చల్లా రాజగోపాల్ యాదవ్, TDP పట్టణ మాజీ అధ్యక్షులు ఇవి సుధాకర్ రెడ్డి, BJP జిల్లా కార్యదర్శి కోనేటి ప్రదీప్ రెడ్డి, జనసేన నాయకులు సుంకర మురళీ, కూటమి ప్రభుత్వ నాయకులు, కార్యకర్తలు, ప్రజలు, మున్సిపల్ సిబ్బంది పాల్గొన్నారు.
ప్లాస్టిక్ రహిత ప్రొద్దుటూరు లక్ష్య సాధనలో ప్రజల భాగస్వామ్యం అత్యంత కీలకమని, ప్రతి ఇంటి స్థాయిలో ప్లాస్టిక్ వినియోగాన్ని తగ్గించే చర్యలు తీసుకోవాలని సమావేశంలో నిర్ణయించారు. స్వాతంత్ర దినోత్సవం నాటికి పట్టణం ప్లాస్టిక్ రహితంగా మారేందుకు పురపాలక సంఘం, ప్రజాప్రతినిధులు, ప్రజలు సమన్వయంతో పనిచేయాలని నిర్ణయించారు.
