రాయలసీమ న్యూస్, వై.యస్.ఆర్: ప్రొద్దుటూరు పట్టణంలో ట్రాఫిక్ క్రమబద్ధీకరణను మరింత పటిష్ఠం చేయడానికి ట్రాఫిక్ పోలీసులు ప్రత్యేక చర్యలు ప్రారంభించారు. ముఖ్యంగా ప్రధాన రహదారులు, అత్యంత రద్దీగా ఉండే ప్రాంతాల్లో ఆటోలను ఇష్టారాజ్యంగా నిలిపివేయడం వల్ల ఏర్పడుతున్న ట్రాఫిక్ సమస్యలను అరికట్టేందుకు మంగళవారం ప్రత్యేక కౌన్సెలింగ్ కార్యక్రమం నిర్వహించారు.
స్థానిక ట్రాఫిక్ పోలీసుల ఆధ్వర్యంలో జరిగిన ఈ కార్యక్రమంలో ఆటో డ్రైవర్లకు ట్రాఫిక్ నిబంధనలు, పార్కింగ్ నియమాలు, ప్రయాణికుల పట్ల ప్రవర్తన వంటి అంశాలపై అవగాహన కల్పించారు. ప్రధాన రహదారులపై, రద్దీ ప్రాంతాల్లో ఆటోలను రోడ్డుకు అడ్డంగా నిలిపి ఉంచడంపై ట్రాఫిక్ సీఐ భాస్కర్ తీవ్ర అసంతృప్తి వ్యక్తం చేశారు.
పాత బస్టాండ్, శివాలయం సర్కిల్, అన్వర్ థియేటర్ వంటి ప్రధాన రద్దీ ప్రాంతాల్లో ఆటోలను నిర్దిష్ట స్థలాలు లేకుండా ఎక్కడ పడితే అక్కడ నిలిపివేయడం వల్ల తీవ్ర ట్రాఫిక్ సమస్యలు తలెత్తుతున్నాయని సీఐ భాస్కర్ పేర్కొన్నారు. దీనివల్ల ప్రయాణికులు, ఇతర వాహనదారులు తీవ్ర ఇబ్బందులు ఎదుర్కొంటున్నారని ఆయన వివరించారు.
నిర్దేశిత పార్కింగ్ ప్రాంతాల్లో మాత్రమే ఆటోలను నిలపాలని, నిబంధనలు అతిక్రమించి అనధికారికంగా పార్క్ చేస్తే భారీ జరిమానాలతో పాటు చట్టపరమైన చర్యలు తప్పవని సీఐ స్పష్టం చేశారు. పట్టణంలో ట్రాఫిక్ క్రమశిక్షణను కాపాడేందుకు ఆటో డ్రైవర్లు పోలీసులకు పూర్తి స్థాయిలో సహకరించాలని ఆయన కోరారు.
కౌన్సెలింగ్ సందర్భంగా ఆటో డ్రైవర్లు తమ సమస్యలను కూడా అధికారుల దృష్టికి తీసుకెళ్లారు. పట్టణంలో ఆటోలకు ప్రత్యేక పార్కింగ్ సౌకర్యం లేకపోవడం వల్లే ఇబ్బందులు ఎదురవుతున్నాయని, పాత బస్టాండ్ ఆవరణలో ఆటోలకు ప్రత్యేక పార్కింగ్ స్థలాన్ని కేటాయించాలని వారు విజ్ఞప్తి చేశారు.
ఈ అంశంపై సీఐ భాస్కర్ సానుకూలంగా స్పందించారు. ఆటో పార్కింగ్ సమస్యను మున్సిపల్ కమిషనర్ దృష్టికి తీసుకెళ్లి, సంబంధిత అధికారులతో సమన్వయం చేసి తగిన పరిష్కారం కనుగొనేందుకు ప్రయత్నిస్తామని ఆయన హామీ ఇచ్చారు.
ట్రాఫిక్ నియంత్రణతో పాటు డ్రైవర్ల ప్రవర్తనపై కూడా అధికారులు కీలక సూచనలు చేశారు. ప్రతి ఆటో డ్రైవర్ విధిగా ఖాకీ యూనిఫాం ధరించాలని, ఆటోలకు పీసీ నంబర్లు వేయించుకోవాలని సీఐ భాస్కర్, ట్రాఫిక్ ఎస్సై భాస్కర్ సూచించారు. ప్రయాణికుల పట్ల మర్యాదగా ప్రవర్తించాలని, ఎలాంటి అనుచిత ప్రవర్తనకు తావివ్వకూడదని వారు హెచ్చరించారు.
ప్రయాణికులను సురక్షితంగా వారి గమ్యస్థానాలకు చేర్చడాన్ని ఆటో డ్రైవర్లు తమ ప్రధాన బాధ్యతగా భావించాలని అధికారులు సూచించారు. కార్యక్రమంలో ట్రాఫిక్ పోలీస్ సిబ్బంది, స్థానిక ఆటో డ్రైవర్లు పాల్గొన్నారు.
