రాయలసీమ న్యూస్, వై.యస్.ఆర్: ప్రొద్దటూరు పట్టణంలోని ఒకటవ వార్డు బొల్లవరం పురపాలక ప్రాథమిక పాఠశాలకు వెళ్లే రహదారి పూర్తిగా గుంతలమయంగా మారి అధ్వాన్న స్థితికి చేరుకుంది. పాఠశాల ప్రధాన ద్వారం ముందు నుంచే ఈ దారి తీవ్రంగా దెబ్బతినడంతో ప్రతిరోజూ బడికి వెళ్లే చిన్నపిల్లలు ఇబ్బందులు పడుతున్నారు. అదే మార్గంలో ఉన్న ఒకటవ వార్డు సచివాలయానికి వెళ్లే ప్రజలకూ ఈ పరిస్థితి ఇరకాటంగా మారింది.
బొల్లవరం పురపాలక ప్రాథమిక పాఠశాలలో 1 నుండి 5వ తరగతి వరకు విద్యార్థులు చదువుకుంటున్నారు. ముఖ్యంగా 1, 2 తరగతులకు చెందిన చిన్నపిల్లలు బురదతో నిండిన ఈ రహదారిపై నడుస్తూ కిందపడి గాయపడిన సంఘటనలు చోటుచేసుకున్నాయని స్థానికులు తెలిపారు. వర్షాలు పడినప్పుడల్లా రహదారిలో ఏర్పడిన గుంతల్లో నీరు నిలిచిపోవడంతో పరిస్థితి మరింత ప్రమాదకరంగా మారుతోంది.
వర్షపు నీరు నిలిచిన ఈ గుంతల వల్ల ఎప్పుడైనా ప్రమాదాలు జరిగే అవకాశం ఉందని విద్యార్థుల తల్లిదండ్రులు ఆందోళన వ్యక్తం చేస్తున్నారు. పిల్లలు బడికి వెళ్లే, తిరిగి వచ్చే సమయాల్లో ఈ దారిలో నడవాల్సి రావడంతో తల్లిదండ్రులు తీవ్ర అసంతృప్తి వ్యక్తం చేస్తున్నారు. చిన్నపిల్లల భద్రతను దృష్టిలో పెట్టుకుని అధికారులు తక్షణ చర్యలు తీసుకోవాలని వారు కోరుతున్నారు.
ఇదే మార్గంలో ఉన్న వాటర్ ప్లాంట్ వద్దకు తాగునీటి కోసం వెళ్లే ద్విచక్ర వాహనదారులు, వృద్ధులు కూడా ఈ గుంతల కారణంగా కిందపడి గాయపడుతున్నారని స్థానికులు చెబుతున్నారు. బురద, గుంతలతో నిండిన ఈ రహదారిపై వాహనాలు నడపడం కష్టసాధ్యమైపోయిందని వారు పేర్కొంటున్నారు.
ఇప్పటికైనా సంబంధిత పురపాలక అధికారులు పరిస్థితిని సీరియస్గా తీసుకుని, ప్రమాదకరంగా మారిన ఈ రహదారికి తక్షణ మరమ్మతులు చేపట్టాలని విద్యార్థుల తల్లిదండ్రులు, వాహనదారులు, స్థానికులు గట్టిగా కోరుతున్నారు. చిన్నపిల్లలు, వృద్ధులు, సాధారణ ప్రజల రాకపోకలకు ఈ దారి కీలకమైందని, ఆలస్యం చేస్తే మరిన్ని ప్రమాదాలు సంభవించే అవకాశం ఉందని వారు హెచ్చరిస్తున్నారు.
