రాయలసీమ న్యూస్, వై.యస్.ఆర్: ప్రొద్దుటూరు ప్రాంతంలో కోట్ల రూపాయల భూ వ్యవహారాలపై వచ్చిన స్కామ్ ఆరోపణలు రాజకీయ వర్గాల్లో తీవ్ర చర్చనీయాంశంగా మారాయి. టీడీపీ నేత నాగరాజు చేసిన ఆరోపణలపై మాజీ వైస్ చైర్మన్ మునిరెడ్డి తీవ్ర ఆగ్రహం వ్యక్తం చేస్తూ, పూర్తి స్థాయి విచారణ జరిపి నిజానిజాలు వెలికి తీయాలని డిమాండ్ చేశారు.
నాగరాజు ఆరోపణలతో సంబంధం ఉన్న ఆడియోను భాగంగా కాకుండా పూర్తిగా ప్రజలకు వినిపించాలని మునిరెడ్డి కోరారు. ఆడియోలో ఉన్న ప్రతి అంశాన్ని పరిశీలిస్తే వాస్తవ పరిస్థితి బయటపడుతుందని ఆయన అభిప్రాయపడ్డారు. రెండున్నర కోట్ల రూపాయల భూ వ్యవహారంపై సమగ్ర విచారణ జరిపి, ఎవరు ఏ విధంగా ప్రమేయం కలిగి ఉన్నారో స్పష్టత తీసుకురావాలని ఆయన డిమాండ్ చేశారు.
రిజిస్ట్రేషన్ కార్యాలయంలో రూ.25 లక్షల రూపాయల వ్యవహారంపై కూడా అనేక ప్రశ్నలు తలెత్తుతున్నాయని మునిరెడ్డి పేర్కొన్నారు. ఈ వ్యవహారంలో సంబంధిత అధికారుల పాత్ర ఏమిటి, ఎందుకు ఇప్పటివరకు వారిపై ఎలాంటి చర్యలు తీసుకోలేదని ఆయన ప్రశ్నించారు. ఆరోపణలు చేస్తున్నవారు కూడా ఈ అంశంపై స్పష్టమైన ఆధారాలు చూపాల్సిన అవసరం ఉందని ఆయన సూచించారు.
ఈ కేసులో పోలీసుల విచారణ తీరుపైనా మునిరెడ్డి అనుమానాలు వ్యక్తం చేశారు. అజీరయ్యను 15 రోజుల పాటు పోలీస్ స్టేషన్కు పిలుస్తూ విచారణ జరిపిన విధానం పట్ల ప్రశ్నలు లేవనెత్తారు. ఇంతకాలం విచారణ జరిపి కూడా స్పష్టమైన ఆధారాలు బయటపెట్టకుండా ఆరోపణలు కొనసాగించడం సరైన పద్ధతి కాదని ఆయన అభిప్రాయపడ్డారు.
భూ వ్యవహారంలో అసలు వాస్తవాలు ప్రజలకు తెలియజేయాలని, వందల కోట్ల రూపాయల భూ కుంభకోణం జరిగిందని చెప్పేవారు దానికి సంబంధించిన పక్కా ఆధారాలు చూపాలని మునిరెడ్డి సవాల్ విసిరారు. నిరాధార ఆరోపణలతో వ్యక్తులపై బురదజల్లే ప్రయత్నాలు మానుకోవాలని రాజకీయ నాయకులకు సూచించారు.
ఈ మొత్తం వ్యవహారంపై పూర్తి స్థాయి విచారణ జరిపి, ఎవరు తప్పు చేశారు, ఎవరు నిర్దోషులు అన్నది స్పష్టంగా తేల్చాలని మునిరెడ్డి డిమాండ్ చేశారు. ఆరోపణలు, ప్రతిఆరోపణలతో కాకుండా, చట్టపరమైన విచారణ ద్వారా నిజం బయటపడేలా అధికార యంత్రాంగం ముందుకు రావాలని ఆయన అభిప్రాయపడ్డారు.
