రాయలసీమ న్యూస్, వై.యస్.ఆర్: ప్రొద్దుటూరు జిల్లా ఆసుపత్రిలో తల్లి–బిడ్డ ఎక్స్ప్రెస్ వాహన సేవలను గౌరవ శాసన సభ్యులు వరదరాజుల రెడ్డి ప్రారంభించారు. ఈ సందర్భంగా ఆయన మాట్లాడుతూ గర్భిణీలు, బాలింతలు, నవజాత శిశువులకు సురక్షితంగా, సౌకర్యవంతంగా రవాణా సదుపాయం కల్పించేందుకు ప్రభుత్వం అందిస్తున్న తల్లి–బిడ్డ ఎక్స్ప్రెస్ సేవలను ప్రజలు పూర్తిగా సద్వినియోగం చేసుకోవాలని సూచించారు.
ప్రభుత్వ ఆసుపత్రుల్లో గర్భవతులు క్రమం తప్పకుండా పరీక్షలు చేయించుకొని, ఇక్కడే ప్రసవం జరగేలా చూడాలని వరదరాజుల రెడ్డి పేర్కొన్నారు. ప్రభుత్వ వైద్య సేవలు అందరికీ అందుబాటులో ఉన్నందున, ముఖ్యంగా పేద కుటుంబాలు, గ్రామీణ ప్రాంతాల ప్రజలు ఈ సేవలను మరింతగా వినియోగించుకోవాలని ఆయన అభిప్రాయపడ్డారు.
ఉప జిల్లా వైద్య మరియు ఆరోగ్య శాఖాధికారి డా గీత మాట్లాడుతూ ప్రభుత్వ ఆసుపత్రులు, ప్రాథమిక ఆరోగ్య కేంద్రాలు మరియు ఇతర ప్రభుత్వ ఆరోగ్య కేంద్రాల్లో ప్రసవం అనంతరం తల్లి, బిడ్డను సురక్షితంగా వారి ఇంటికి చేర్చేందుకు తల్లి–బిడ్డ ఎక్స్ప్రెస్ సేవలు ఎంతో ఉపయోగకరంగా ఉంటాయని తెలిపారు.
డా గీత ప్రకారం, ముఖ్యంగా పేద మరియు గ్రామీణ ప్రాంతాల గర్భిణీలు, బాలింతలకు ఈ సేవలు మరింత ప్రయోజనకరంగా ఉంటాయి. తల్లి మరియు నవజాత శిశువుల ఆరోగ్య భద్రతకు ప్రసవానంతర సంరక్షణ అత్యంత కీలకమని ఆమె పేర్కొన్నారు. ఇంటికి చేరిన తరువాత కూడా తల్లి–బిడ్డ ఆరోగ్య పరిస్థితిని ఆశా కార్యకర్తలు, ఏఎన్ఎంల సూచనల మేరకు పర్యవేక్షించుకోవాలని ఆమె సూచించారు.
జిల్లా ఆసుపత్రి సూపరింటెండెంట్ డా ఆనంద్ బాబు మాట్లాడుతూ ప్రభుత్వ ఆసుపత్రుల్లో ప్రసవాలను ప్రోత్సహించడం, తల్లులు మరియు శిశువుల ఆరోగ్యాన్ని కాపాడటం, ప్రసవ సమయంలో మరియు ప్రసవానంతరం ఎదురయ్యే రవాణా ఇబ్బందులను తగ్గించడం తల్లి–బిడ్డ ఎక్స్ప్రెస్ ప్రధాన లక్ష్యమని వివరించారు.
“తల్లి ఆరోగ్యం – బిడ్డ ఆరోగ్యం – కుటుంబ సంక్షేమం కోసం ప్రభుత్వం అందిస్తున్న ఈ సేవలను ప్రతి ఒక్కరూ సద్వినియోగం చేసుకోవాలి” అని డా ఆనంద్ బాబు తెలిపారు.
ఈ కార్యక్రమంలో ఆసుపత్రి అభివృద్ధి కమిటీ సభ్యులు శ్రీనివాసరెడ్డి, డా గోపాల్, డా సాగర కుమారి, డిప్యూటి హెల్త్ ఎడ్యుకేషన్ ఆఫీసర్ వెంకటేశ్వర్లు, నర్సింగ్ సూపరింటెండెంట్ లిల్లీ ఫోరన్స్తో పాటు ఆసుపత్రి సిబ్బంది పాల్గొన్నారు. కార్యక్రమం అనంతరం తల్లి–బిడ్డ ఎక్స్ప్రెస్ వాహనాలను అధికారికంగా సేవలోకి ప్రవేశపెట్టారు.
