రాయలసీమ న్యూస్, వై.యస్.ఆర్: అమరావతి: ఆంధ్రప్రదేశ్ శాసనసభలో అరుదైన, గర్వకారణమైన ఘట్టం చోటుచేసుకుంది. వైఎస్ఆర్ కడప జిల్లా ప్రొద్దుటూరు నియోజకవర్గానికి చెందిన శాసనసభ్యులు నంద్యాల వరదరాజులరెడ్డి, శాసనసభ స్పీకర్ స్థానంలో ఆసీనులయ్యే అవకాశం పొందారు. అసెంబ్లీ ప్యానెల్ స్పీకర్గా ఆయనకు బాధ్యతలు అప్పగించగా, గురువారం జరిగిన సభా కార్యక్రమాలను సభాపతి స్థానంలో నుంచే నిర్వహించారు.
ప్రొద్దుటూరు నియోజకవర్గ చరిత్రలో ఇలాంటి అవకాశం ఇదే మొదటిసారి లభించడం విశేషంగా మారింది. వరుసగా ఐదు సార్లు ప్రొద్దుటూరు నుంచి ఎమ్మెల్యేగా గెలుపొందిన వరదరాజులరెడ్డి, తన దీర్ఘ రాజకీయ అనుభవంతో సభా కార్యక్రమాలను ముందుకు నడిపారు. ఈ గౌరవం తమ నియోజకవర్గ నాయకుడికి దక్కడం పట్ల స్థానిక ప్రజలు, తెలుగు దేశం పార్టీ శ్రేణులు హర్షం వ్యక్తం చేస్తున్నారు.
అసెంబ్లీ ప్యానెల్ స్పీకర్గా బాధ్యతలు చేపట్టిన వరదరాజులరెడ్డి, సభ్యుల ప్రసంగాలు, చర్చలను సభా నిబంధనలకు అనుగుణంగా పర్యవేక్షించారు. సభా వ్యవహారాల నిర్వహణలో సమన్వయం పాటిస్తూ, స్పీకర్ స్థానంలో తనదైన శైలిలో వ్యవహరించిన తీరు సభలోని సభ్యుల ప్రశంసలు పొందింది.
సభను నడిపించిన వరదరాజులరెడ్డి దృశ్యాలు సోషల్ మీడియా , టెలివిజన్ ఛానళ్ల ద్వారా ప్రత్యక్ష ప్రసారమయ్యాయి. దీంతో ప్రొద్దుటూరు నియోజకవర్గానికి చెందిన అభిమానులు, తెలుగు దేశం పార్టీ నాయకులు, కార్యకర్తలు ఆనందం వ్యక్తం చేశారు. తమ నియోజకవర్గ నాయకుడు అసెంబ్లీని నడిపించే బాధ్యతలు చేపట్టడం స్థానికంగా పెద్ద చర్చనీయాంశంగా మారింది.
ప్రొద్దుటూరు ప్రజలు, పార్టీ శ్రేణులు ఈ అవకాశాన్ని నియోజకవర్గానికి దక్కిన ప్రత్యేక గౌరవంగా భావిస్తున్నారు. ఎన్నో సంవత్సరాలుగా ప్రజా సమస్యలను అసెంబ్లీలో బలంగా ప్రస్తావిస్తూ వస్తున్న తమ నాయకుడు, ఇప్పుడు సభను నియంత్రించే అత్యున్నత స్థానంలో కూర్చోవడం పార్టీ కార్యకర్తల్లో కొత్త ఉత్సాహాన్ని నింపిందని వారు చెబుతున్నారు.
మన ఎమ్మెల్యే.. సభాపతి స్థానంలో
అని తెలుగు దేశం పార్టీ కార్యకర్తలు, తెలుగు తమ్ముళ్లు పరస్పరం ఆనందాన్ని పంచుకుంటున్నారు. ఈ పరిణామం ప్రొద్దుటూరు రాజకీయ వర్గాల్లో ప్రత్యేక ఆకర్షణగా నిలుస్తోంది. నియోజకవర్గ చరిత్రలో మైలురాయిగా నిలిచే ఈ ఘట్టం స్థానిక రాజకీయాల్లో కొత్త ఉత్సాహాన్ని తీసుకొచ్చిందని రాజకీయ విశ్లేషకులు అభిప్రాయపడుతున్నారు.
