రాయలసీమ న్యూస్, వై.యస్.ఆర్: ప్రొద్దుటూరు: ఆటోలో ప్రయాణిస్తుండగా అనుకోకుండా కిందపడిపోయిన సుమారు రూ.10 లక్షల విలువైన బంగారు ఆభరణాలతో కూడిన బ్యాగ్ను ప్రొద్దుటూరు 1 టౌన్ పోలీసులు చాకచక్యంగా గుర్తించి బాధితురాలికి సురక్షితంగా అప్పగించారు. పోలీసుల సమయస్ఫూర్తి, సీసీ కెమెరాల సమర్థవంతమైన వినియోగంపై పట్టణ ప్రజలు ప్రశంసలు కురిపిస్తున్నారు.
నేతాజీ నగర్కు చెందిన ఎస్.కె. షాహిజాన్ (70) గురువారం ఇంటి నుంచి ఆటోలో ప్రొద్దుటూరు పాత బస్టాండ్కు బయలుదేరారు. ప్రయాణం మధ్యలో ఆమె వద్ద ఉన్న బంగారు ఆభరణాలతో కూడిన బ్యాగ్ ఆటో నుంచి జారి రోడ్డుపై పడిపోయింది. పాత బస్టాండ్కు చేరుకున్న తర్వాత బ్యాగ్ కనిపించకపోవడంతో ఆందోళనకు గురైన షాహిజాన్ వెంటనే ప్రొద్దుటూరు 1 టౌన్ పోలీస్ స్టేషన్కు వెళ్లి ఘటనను పోలీసులకు వివరించారు.
బాధితురాలి ఫిర్యాదు స్వీకరించిన వెంటనే ఇన్స్పెక్టర్ టి.వి. కొండారెడ్డి ఆధ్వర్యంలో ఎస్ఐ శ్రీనివాసులు, సిబ్బంది లాల్ పీరా, రామచంద్ర, శివకుమార్లు గాలింపు చర్యలు ప్రారంభించారు. ముందుగా షాహిజాన్ ప్రయాణించిన ఆటోను గుర్తించిన పోలీసులు, ఆ మార్గమంతా ఏర్పాటు చేసిన సీసీ కెమెరాల దృశ్యాలను నిశితంగా పరిశీలించారు.
సీసీ కెమెరాల రికార్డింగ్ ఆధారంగా ఆర్ట్స్ కాలేజీ సమీపంలో బ్యాగ్ రోడ్డుపై పడిపోయిన దృశ్యాలు పోలీసులకు లభించాయి. వెంటనే ఆ ప్రాంతంలో గాలింపు చేపట్టి, అక్కడే పడివున్న బ్యాగ్ను పోలీసులు భద్రంగా స్వాధీనం చేసుకున్నారు. అనంతరం బ్యాగ్లో ఉన్న సుమారు రూ.10 లక్షల విలువైన బంగారు ఆభరణాలను లెక్కించి, సురక్షితంగా బాధితురాలు ఎస్.కె. షాహిజాన్కు అప్పగించారు.
పోగొట్టుకున్న విలువైన ఆభరణాలను తక్షణమే గుర్తించి తిరిగి అందజేయడంలో ఎస్ఐ శ్రీనివాసులు, సిబ్బంది లాల్ పీరా, రామచంద్ర, శివకుమార్లు చూపిన చొరవ, సమయస్ఫూర్తిని ఇన్స్పెక్టర్ టి.వి. కొండారెడ్డి ప్రత్యేకంగా అభినందించారు. ప్రజల ఆస్తికి భద్రత కల్పిస్తూ, బాధితురాలికి అండగా నిలిచిన ప్రొద్దుటూరు 1 టౌన్ పోలీసుల తీరుపై స్థానికులంతా హర్షం వ్యక్తం చేస్తున్నారు.
సీసీ కెమెరాల ఆధారంగా జరిగిన ఈ గాలింపు చర్య, విలువైన ఆభరణాల బ్యాగ్ను ఎలాంటి నష్టం లేకుండా తిరిగి అందజేయడం పోలీసు వ్యవస్థపై ప్రజల్లో నమ్మకాన్ని మరింత పెంచిందని పట్టణ వాసులు అభిప్రాయపడుతున్నారు.
