రాయలసీమ న్యూస్, వై.యస్.ఆర్: ప్రొద్దుటూరులో 'ఇంటింటికీ తెలుగుదేశం': మల్లెల లింగారెడ్డి
ప్రొద్దుటూరు నియోజకవర్గంలో తెలుగుదేశం పార్టీ ప్రతిష్టాత్మకంగా చేపట్టిన “ఇంటింటికీ తెలుగుదేశం” కార్యక్రమం శనివారం అత్యంత ఉత్సాహంగా సాగింది. ఇందులో భాగంగా మాజీ ఎమ్మెల్యే మల్లెల లింగారెడ్డి వైఎంఆర్ (YMR) కాలనీ పరిసరాల్లోని పార్కులు, కేఫ్ సెంటర్లలో ఉన్న ప్రజలను ప్రత్యక్షంగా కలుసుకుని సంభాషించారు.
ఈ సందర్భంగా మల్లెల లింగారెడ్డి మాట్లాడుతూ.. కూటమి ప్రభుత్వం అధికారంలోకి వచ్చిన తర్వాత రాష్ట్రంలో సంక్షేమం, అభివృద్ధి రంగాల్లో విప్లవాత్మక మార్పులు వచ్చాయని వివరించారు. తెలుగుదేశం పార్టీ అధినేత, ముఖ్యమంత్రి నారా చంద్రబాబు నాయుడు నాయకత్వంలో ప్రభుత్వం రాష్ట్రాన్ని వేగంగా అభివృద్ధి పథంలో ముందుకు తీసుకెళ్తుందని ఆయన ప్రజలకు స్పష్టం చేశారు. కూటమి ప్రభుత్వం ప్రవేశపెట్టిన “తల్లికి వందనం”, “అన్నదాత సుఖీభవ”, “అన్నా క్యాంటీన్” వంటి ప్రతిష్టాత్మక పథకాలతో పాటు చేనేత కార్మికులకు ఉచిత విద్యుత్, ఆర్థిక సాయం, “దీపం” పథకం, “NTR భరోసా” పెన్షన్, ఆటో డ్రైవర్ల సేవలో, మత్స్యకారుల సేవలో మరియు “శ్రీ శక్తి” వంటి అనేక సంక్షేమ కార్యక్రమాలను అమల్లోకి తెచ్చినట్లు ఆయన గుర్తు చేశారు.
ఈ సంక్షేమ పథకాల ద్వారా పేద, మధ్యతరగతి, కార్మిక వర్గాల జీవన ప్రమాణాలు మెరుగుపడుతున్నాయని, ఇలాంటి ప్రజాహిత కార్యక్రమాలను నిరంతరాయంగా కొనసాగించేందుకు కూటమి ప్రభుత్వానికి ప్రజలు మరింత మద్దతు ఇవ్వాలని మల్లెల లింగారెడ్డి కోరారు. పార్టీ లక్ష్యాలు, ప్రభుత్వ సంక్షేమ చర్యలను ప్రతి ఒక్కరికీ చేరవేయడమే ఈ కార్యక్రమ ముఖ్య ఉద్దేశమని ఆయన కార్యకర్తలకు సూచించారు.
మల్లెల లింగారెడ్డి మాజీ ఎమ్మెల్యే కార్యాలయం పరిధిలో జరిగిన ఈ కార్యక్రమంలో మున్సిపల్ మాజీ వైస్ ఛైర్మన్ కమిశెట్టి బాబు, మాజీ కౌన్సిలర్ రామసంజీవరెడ్డి, నాయకులు తప్పా మహబూబ్ బాషా, జిల్లెళ్ల వెంకటేష్, కదిరి రామకృష్ణారెడ్డి, గంగుల రంగారెడ్డి, గిద్దలూరు ఈశ్వరయ్య, మహమ్మద్ రఫీ, కృష్ణయ్య, షేక్షా వలి తదితర తెలుగుదేశం పార్టీ నాయకులు, కార్యకర్తలు పెద్ద సంఖ్యలో పాల్గొన్నారు. Local పార్టీ బలోపేతంతో పాటు ప్రభుత్వ పథకాలపై పట్టణ స్థాయిలో అవగాహన పెంచే దిశగా ఈ కార్యక్రమం కొనసాగుతుందని పార్టీ వర్గాలు తెలిపాయి.
