రాయలసీమ న్యూస్, వై.యస్.ఆర్: ప్రొద్దుటూరు: రైతులు ఈ ఖరీఫ్ సీజన్లో పంటల సాగు ప్రారంభించే ముందు నీటి లభ్యతను తప్పనిసరిగా పరిగణనలోకి తీసుకోవాలని ప్రొద్దుటూరు నియోజకవర్గ ఎమ్మెల్యే నంద్యాల వరదరాజుల రెడ్డి సూచించారు. ప్రొద్దుటూరు నెహ్రూ రోడ్డులోని తన కార్యాలయంలో శనివారం నిర్వహించిన విలేకరుల సమావేశంలో ఆయన ప్రస్తుత సాగునీటి పరిస్థితులపై ఆందోళన వ్యక్తం చేశారు.
ఎల్ నినో ప్రభావంతో ఈ ఏడాది సాగునీటి పరిస్థితి ఇబ్బందికరంగా మారే అవకాశం ఉందని ఎమ్మెల్యే పేర్కొన్నారు. ప్రస్తుతం అందుబాటులో ఉన్న నీటి వనరులు ప్రధానంగా తాగునీటి అవసరాలకే సరిపోతున్నాయని, ఈ నేపథ్యంతో వ్యవసాయ రంగం ముందున్న సవాళ్లను రైతులు సీరియస్గా తీసుకోవాల్సిన అవసరం ఉందని ఆయన సూచించారు.
రైతులు తొందరపడి నీటి అవసరం అధికంగా ఉండే పంటలను సాగు చేయకూడదని నంద్యాల వరదరాజుల రెడ్డి స్పష్టం చేశారు. ప్రభుత్వం తీసుకునే నిర్ణయాలు, నీటి లభ్యతపై అధికారుల నివేదికలు, సంబంధిత శాఖల సూచనలను పరిశీలించిన అనంతరం మాత్రమే పంటల సాగుపై తుది నిర్ణయం తీసుకోవాలని ఆయన రైతులకు విజ్ఞప్తి చేశారు.
ప్రస్తుత పరిస్థితుల్లో ఆరుతడి పంటలకు ప్రాధాన్యం ఇవ్వడం ద్వారా నీటి కొరతను కొంతవరకు అధిగమించవచ్చని ఎమ్మెల్యే అభిప్రాయపడ్డారు. తక్కువ నీటితో సాగు చేయగలిగే పంటలను ఎంపిక చేసుకోవడం, నీటి వినియోగంలో మితవ్యత పాటించడం ద్వారా రైతులు నష్టాలను తగ్గించుకోవచ్చని ఆయన సూచించారు.
రైతులు వ్యవసాయ శాఖ సూచనలు, సాంకేతిక సలహాలను పాటిస్తూ పంటల ఎంపికలో తగిన జాగ్రత్తలు తీసుకోవాలని నంద్యాల వరదరాజుల రెడ్డి కోరారు. మండల స్థాయి వ్యవసాయ అధికారులు, రైతు సమితుల ద్వారా వస్తున్న మార్గదర్శకాలను సీరియస్గా తీసుకుని, స్థానిక పరిస్థితులకు అనుగుణంగా పంటల ప్రణాళికలు రూపొందించుకోవాలని ఆయన సూచించారు.
ఎల్ నినో ప్రభావం, వర్షపాతం అనిశ్చితి, నీటి వనరుల పరిమితి వంటి అంశాలను దృష్టిలో పెట్టుకుని రైతులు ముందస్తు ప్రణాళికతో సాగు నిర్ణయాలు తీసుకుంటేనే ఈ సీజన్ను సురక్షితంగా దాటవచ్చని ఎమ్మెల్యే నంద్యాల వరదరాజుల రెడ్డి విలేకరుల సమావేశంలో స్పష్టం చేశారు.
