రాయలసీమ న్యూస్, అన్నమయ్య: మదనపల్లెలో ఘోరం: మహిళపై కొడవలితో హత్యాయత్నం, పరిస్థితి విషమం
మదనపల్లె (అన్నమయ్య జిల్లా): మదనపల్లె పట్టణంలోని మాయాబజార్లో గురువారం ఉదయం ఒక మహిళపై జరిగిన హత్యాయత్నం స్థానికంగా తీవ్ర కలకలం సృష్టించింది. ఒకే ఇంట్లో అద్దెకు ఉంటున్న ఓ చేనేత కార్మికుడు సదరు మహిళపై కొడవలితో విచక్షణారహితంగా దాడికి తెగబడినట్లు తెలుస్తోంది.
ఈ దాడిలో బాధితురాలికి సుమారు ఎనిమిది చోట్ల తీవ్రమైన కత్తిపోట్లు గాయాలయ్యాయి. తీవ్ర రక్తస్రావంతో పడివున్న ఆమెను కుటుంబ సభ్యులు గమనించి, తక్షణమే మదనపల్లె జిల్లా ప్రభుత్వ ఆసుపత్రికి తరలించారు. అయితే, బాధితురాలి ఆరోగ్య పరిస్థితి అత్యంత ఆందోళనకరంగా మారడంతో, మెరుగైన వైద్యం కోసం వైద్యులు ఆమెను తిరుపతిలోని రుయా ఆసుపత్రికి రెఫర్ చేశారు.
సమాచారం అందుకున్న స్థానిక పోలీసులు ఘటనా స్థలానికి చేరుకుని పరిశీలించారు. ఈ దాడికి గల పూర్తి కారణాలు ఇంకా తెలియాల్సి ఉంది. పోలీసులు కేసు నమోదు చేసి, నిందితుడి కోసం గాలింపు చేపట్టడంతో పాటు దర్యాప్తును ముమ్మరం చేశారు.
