రాయలసీమ న్యూస్, అన్నమయ్య: మదనపల్లి: రాష్ట్ర ప్రభుత్వం అమలు చేస్తున్న ‘నేతన్న సేవలో’ పథకం ప్రయోజనాలు నిజమైన చేనేత కార్మికులకే చేరేలా చూడాలని, అనర్హులకు ఏ విధంగానూ లబ్ధి దక్కకూడదని సబ్కలెక్టర్ చల్లా కళ్యాణి అధికారులను ఆదేశించారు. మదనపల్లి మండలంలోని నిరుగట్టువారిపల్లి సచివాలయం పరిధిలో మంగళవారం ఆమె మగ్గాల ఇళ్లను ప్రత్యక్షంగా పరిశీలించారు.
పథకం అమలు పరిస్థితులు, లబ్ధిదారుల ఎంపిక విధానం, నమోదు ప్రక్రియలపై సబ్కలెక్టర్ సంబంధిత అధికారులను అడిగి వివరాలు తెలుసుకున్నారు. మగ్గాల ఇళ్లలో నిర్వహిస్తున్న పనితీరును, లబ్ధిదారుల వివరాల నమోదు విధానాన్ని పరిశీలించారు.
పథకం పారదర్శకతకు ప్రాధాన్యం ఇవ్వాలని, ప్రతి లబ్ధిదారుడి వివరాలు క్షేత్రస్థాయిలో ఖచ్చితంగా నమోదు చేయాలని ఆమె సూచించారు. లబ్ధిదారుల ఎంపికలో ఎలాంటి నిర్లక్ష్యం చోటు చేసుకోకూడదని, అర్హతల పరిశీలనలో అధికారులు జాగ్రత్తగా వ్యవహరించాలని ఆదేశించారు.
పథకం లబ్ధిదారుడి ఆధార్ నంబర్ను తప్పనిసరిగా మగ్గంపై పర్మనెంట్ మార్కర్తో నమోదు చేయాలని సూచించారు. ఇంటి డోర్ నంబర్ను ఆధార్తో అనుసంధానం చేసి, జియోట్యాగింగ్తో మగ్గాల ఇళ్ల ఫొటోలను తీసి ఆన్లైన్లో అప్లోడ్ చేయాలని ఆదేశించారు.
అనర్హులు పథకం ద్వారా లబ్ధి పొందకుండా క్షేత్రస్థాయిలో అధికారులు పక్కాగా పరిశీలన చేయాలని సబ్కలెక్టర్ సూచించారు. అదే సమయంలో అర్హత ఉన్న ఏ ఒక్క చేనేత కార్మికుడు పథకం ప్రయోజనం కోల్పోకుండా చర్యలు తీసుకోవాలని చేనేత, జౌళిశాఖ ఏడీ పవన్కుమార్రెడ్డిని ఆమె ఆదేశించారు.
లబ్ధిదారుల ఆధార్ వివరాలు, ఇంటి డోర్ నంబర్లు, జియోట్యాగింగ్ ద్వారా తీసిన ఫొటోలు ఆన్లైన్ వ్యవస్థలో నమోదు కావడంతో పథకం అమలులో పారదర్శకత పెరుగుతుందని అధికారులు పేర్కొన్నారు. భవిష్యత్తులో కూడా ఇదే విధానాన్ని కొనసాగించాలని నిర్ణయించినట్లు తెలిపారు.
కార్యక్రమంలో స్వర్ణవార్డు–స్వర్ణగ్రామ జిల్లా అధికారి అమర్నాథ్రెడ్డి, సంబంధిత శాఖల అధికారులు, స్థానిక సిబ్బంది తదితరులు పాల్గొన్నారు. పథకం అమలు పురోగతిపై సబ్కలెక్టర్ వారికి సూచనలు ఇచ్చి, అవసరమైన మార్పులు, మెరుగుదలలపై చర్చించారు.
