రాయలసీమ న్యూస్, నంద్యాల: నంద్యాల: నంద్యాల జిల్లాలో నెలకొన్న వర్షాభావ పరిస్థితుల కారణంగా రైతులు సాంప్రదాయ పంటల కంటే ప్రత్యామ్నాయ పంటల సాగుపై దృష్టి సారించాలని ఆచార్య ఎన్.జి. రంగా వ్యవసాయ విశ్వవిద్యాలయం ప్రాంతీయ వ్యవసాయ పరిశోధన స్థానం పరిశోధన సహ సంచాలకులు డాక్టర్ వి. జయలక్ష్మి సూచించారు. నంద్యాల మండలం పుసులూరు, మిట్నాల, కొత్తపల్లి గ్రామాల్లో ప్రాంతీయ వ్యవసాయ పరిశోధన స్థానం ఆధ్వర్యంలో వర్షాభావ పరిస్థితులపై రైతులకు ప్రత్యేక అవగాహన సదస్సులు నిర్వహించారు.
ఈ సందర్భంగా డాక్టర్ జయలక్ష్మి మాట్లాడుతూ జిల్లాలోని 29 మండలాల్లో ప్రస్తుతానికి వర్షాభావ పరిస్థితులు నెలకొన్నాయని తెలిపారు. ఇటువంటి సమయంలో ఎక్కువ నీరు అవసరమయ్యే వరి, మొక్కజొన్న వంటి పంటలను సాగు చేయడం రైతులకు నష్టదాయకమని పేర్కొన్నారు. వాటికి బదులుగా తక్కువ నీటితో పండే మినుము, కంది, జొన్న వంటి పంటలను సాగు చేయాలని రైతులకు స్పష్టం చేశారు.
అందుబాటులో ఉన్న నీటిని అత్యంత పొదుపుగా వినియోగించుకునేందుకు డ్రిప్, స్ప్రింక్లర్ వంటి సూక్ష్మ నీటి పారుదల పద్ధతులను అవలంబించాలని ఆమె కోరారు. పంటలకు కీలక దశల్లో మాత్రమే నీరందించడం ద్వారా మంచి దిగుబడులు సాధించవచ్చని వివరించారు. నేలలో తేమ తక్కువగా ఉన్న సమయంలో అవసరమైన పోషకాలను పైపాటుగా ఫోలియర్ స్ప్రే ద్వారా పిచికారీ చేయడం ద్వారా వర్షాభావ ప్రభావాన్ని కొంతవరకు తగ్గించవచ్చని రైతులకు తెలియజేశారు.
వర్షాభావ పరిస్థితుల్లో పంటల ఎంపిక, నీటి వినియోగం, ఎరువుల నిర్వహణ వంటి అంశాలపై శాస్త్రవేత్తలు రైతులకు సవివరంగా సూచనలు అందించారు. ప్రస్తుత పరిస్థితుల్లో నీటి లభ్యతను దృష్టిలో పెట్టుకుని పంటల ప్రణాళికను మార్చుకోవాల్సిన అవసరాన్ని రైతులకు వివరించారు. వర్షాభావం దీర్ఘకాలం కొనసాగిన సందర్భంలో పంట నష్టాలను తగ్గించేందుకు అనుసరించాల్సిన శాస్త్రీయ పద్ధతులపై అవగాహన కల్పించారు.
ఈ అవగాహన కార్యక్రమంలో ప్రాంతీయ వ్యవసాయ పరిశోధన స్థానం శాస్త్రవేత్తలు డాక్టర్ కే. అశోక్ కుమార్, డాక్టర్ బి. రవి ప్రకాష్ రెడ్డి, డాక్టర్ పులి బాయ్, డాక్టర్ వై. గౌతమి, మండల వ్యవసాయ అధికారి ఈ. ప్రసాదరావు మరియు స్థానిక రైతులు పెద్ద సంఖ్యలో పాల్గొన్నారు. రైతులు తమ ప్రాంతాల్లో వర్షాభావం తీవ్రత, పంటల పరిస్థితి, నీటి లభ్యతపై శాస్త్రవేత్తలతో చర్చించి, తగిన సలహాలు పొందారు.
