రాయలసీమ న్యూస్, శ్రీ సత్యసాయి: కదిరి ప్రాంతంలో భూ కబ్జా వివాదం రాజకీయ వర్గాల్లో చర్చనీయాంశంగా మారింది. బీజేపీ మాజీ ఎమ్మెల్యే ఎంఎస్ పార్థసారథి, కదిరి టీడీపీ ఎమ్మెల్యే కందికుంట ప్రసాద్ పేర్లు ఈ వ్యవహారంలో వినిపిస్తున్నాయి. కదిరి మండలం గట్లు పరిసరాల్లో సుమారు రూ.5 కోట్ల విలువ చేసే భూమిని అక్రమంగా స్వాధీనం చేసుకునే ప్రయత్నం జరుగుతోందని ఆరోపణలు వినిపిస్తున్నాయి.
చెర్లోపల్లి రిజర్వాయర్ నిర్మాణం కారణంగా భూ నిర్వాసితులకు ప్రభుత్వం కేటాయించిన ఇళ్ల స్థలాలపై కొంతమంది టీడీపీ, బీజేపీ నేతలు కన్నేశారని స్థానికులు ఆరోపిస్తున్నారు. పేదలకు ఇచ్చిన ఈ స్థలాలను కబ్జా చేసేందుకు రాత్రి రాత్రికే రెవెన్యూ రికార్డులు తారుమారు చేస్తున్నారనే ఆరోపణలు వెలువడుతున్నాయి. భూ రికార్డుల్లో మార్పులు ఎలా జరిగాయన్న దానిపై అధికారుల పాత్రపై కూడా ప్రశ్నలు తలెత్తుతున్నాయి.
ఈ వ్యవహారంలో బీజేపీ మాజీ ఎమ్మెల్యే ఎంఎస్ పార్థసారథి పేరు బహిరంగంగా వినిపిస్తోంది. ఆయనతో ‘సెటిల్’ చేసుకోవాలని, లేకపోతే సమస్యలు ఎదుర్కోవాల్సి వస్తుందని కొందరికి బెదిరింపులు వచ్చాయని స్థానిక వర్గాలు చెబుతున్నాయి. ఈ నేపథ్యంలో సోషల్ మీడియాలో వైరల్ అవుతున్న ఒక ఆడియో రికార్డింగ్ మరింత సంచలనం రేపింది. ఆ ఆడియోలో భూమి వ్యవహారంపై జరుగుతున్న చర్చ, ఒత్తిళ్ల గురించి వినిపిస్తున్నట్లు సోషల్ మీడియాలో వినియోగదారులు వ్యాఖ్యానిస్తున్నారు.
బీజేపీ నేత పార్థసారథి భూ కబ్జా ప్రయత్నాల వెనుక కదిరి టీడీపీ ఎమ్మెల్యే కందికుంట ప్రసాద్ సహకారం ఉందని కూడా ఆరోపణలు వస్తున్నాయి. ఇద్దరు నేతలు కలసి ఈ భూములను స్వాధీనం చేసుకునే ప్రయత్నం చేస్తున్నారనే ఆరోపణలను స్థానిక రాజకీయ ప్రత్యర్థులు, బాధితులుగా చెప్పుకుంటున్న కొందరు వ్యక్తులు సోషల్ మీడియా వేదికగా ప్రచారం చేస్తున్నారు.
ఇక ఈ ఆరోపణలపై అధికారికంగా సంబంధిత నేతల నుంచి స్పందన రావాల్సి ఉంది. రెవెన్యూ శాఖ అధికారులు కూడా రికార్డుల తారుమారుపై స్పష్టత ఇవ్వాల్సి ఉంది. చెర్లోపల్లి రిజర్వాయర్ భూ నిర్వాసితులకు కేటాయించిన ఇళ్ల స్థలాలపై ఇలాంటి ఆరోపణలు రావడం పట్ల స్థానికులు ఆందోళన వ్యక్తం చేస్తున్నారు. పేదల హక్కులను కాపాడాలని, భూ కబ్జా ఆరోపణలపై సమగ్ర విచారణ జరిపి నిజానిజాలు వెలికి తీయాలని ప్రజలు డిమాండ్ చేస్తున్నారు.
