రాయలసీమ న్యూస్, జాబ్స్ డెస్క్: కదిరి: శ్రీ సత్యసాయి జిల్లా కదిరి పట్టణంలో అభిజ్ఞా ఫౌండేషన్ ఆధ్వర్యంలో సేవా కార్యక్రమాల భాగంగా నిరుద్యోగ యువతకు ఉపాధి అవకాశాలు కల్పించేందుకు మెగా జాబ్ మేళా నిర్వహించనున్నారు. ఈ నెల 22వ తేదీన కదిరి పరిసర ప్రాంతాల నిరుద్యోగులను దృష్టిలో పెట్టుకుని ఈ జాబ్ మేళాను ఏర్పాటు చేస్తున్నట్లు నిర్వాహకులు తెలిపారు.
అభిజ్ఞా ఫౌండేషన్ వ్యవస్థాపకులు డా. పి.వి. పవన్ కుమార్ రెడ్డి వివరాలు తెలియజేశారు. ఈ జాబ్ మేళా ద్వారా స్థానికంగా ఉన్న నిరుద్యోగ యువత, పట్టభద్రులు, వివిధ విద్యార్హతలు కలిగిన అభ్యర్థులకు ఉద్యోగ అవకాశాలు లభించేలా చర్యలు తీసుకుంటున్నట్లు ఆయన చెప్పారు.
30కి పైగా ప్రముఖ కంపెనీలు సుమారు 1000 మందికి పైగా ఉద్యోగ అవకాశాలు దక్కుతాయని, విద్యార్హత కలిగిన ప్రతి ఒక్కరు ఈ అవకాశాన్ని సద్వినియోగం చేసుకోవాలని కోరారు.
జాబ్ మేళాలో పాల్గొనే కంపెనీల వివరాలు, ఎంపిక విధానం, ఇంటర్వ్యూ సమయాలు వంటి అంశాలను అభిజ్ఞా ఫౌండేషన్ త్వరలో ప్రకటించనుంది. కదిరి పట్టణం మాత్రమే కాకుండా పరిసర గ్రామాలు, మండలాల నుంచి కూడా నిరుద్యోగులు ఈ మేళాకు హాజరయ్యేలా ప్రచారం చేపడుతున్నారు.
ఉద్యోగ అవకాశాల కోసం పెద్ద నగరాలకు వెళ్లలేని గ్రామీణ ప్రాంతాల యువతకు ఈ జాబ్ మేళా ఉపయోగపడుతుందని నిర్వాహకులు భావిస్తున్నారు. స్థానికంగా ఉపాధి అవకాశాలు కల్పించడం ద్వారా కుటుంబాల ఆర్థిక స్థితి మెరుగుపడటంతో పాటు యువతలో ఆత్మవిశ్వాసం పెరుగుతుందని వారు పేర్కొన్నారు.
జాబ్ మేళాలో పాల్గొనదలచిన అభ్యర్థులు తమ విద్యార్హతలకు సంబంధించిన సర్టిఫికెట్లు, ఆధార్ వంటి అవసరమైన పత్రాలు వెంట తీసుకురావాలని సూచిస్తున్నారు. మరిన్ని వివరాల కోసం అభిజ్ఞా ఫౌండేషన్ కార్యాలయాన్ని సంప్రదించాలని నిర్వాహకులు తెలిపారు.
