రాయలసీమ న్యూస్, శ్రీ సత్యసాయి: శ్రీ సత్య సాయి జిల్లా:- పెనుకొండ నియోజకవర్గం పరిగి మండలం శ్రీరంగరాజుపల్లి గ్రామంలో బీటీ రోడ్డు నిర్మాణ పనులకు శుక్రవారం భూమిపూజ నిర్వహించారు. తాతయ్య దర్గా వద్ద నుంచి మోదా పంచాయతీ చెర్లోపల్లి గ్రామం వరకు సుమారు 4 కోట్ల 11 లక్షల రూపాయల వ్యయంతో ఈ రహదారి నిర్మాణం చేపడుతున్నారు. సంబంధిత శాఖల ద్వారా లభించిన సాస్కీ నిధులతో ఈ పనులు జరగనున్నట్లు అధికారులు తెలిపారు.
స్థానిక కూటమి వ్నాయకులు, కార్యకర్తలు, గ్రామ పెద్దలు, అధికారులు కలిసి భూమిపూజ కార్యక్రమంలో పాల్గొన్నారు. తాతయ్య దర్గా సమీపంలో సంప్రదాయ పద్ధతిలో పూజలు నిర్వహించిన అనంతరం రహదారి పనులకు శుభారంభం చేశారు. గ్రామ ప్రజలు పెద్ద సంఖ్యలో హాజరై కార్యక్రమాన్ని వీక్షించారు.
ఈ రహదారి పూర్తయితే శ్రీరంగరాజుపల్లి నుంచి చెర్లోపల్లి, మోదా పంచాయతీ పరిధిలోని పలు గ్రామాలకు రాకపోకలు సులభతరం కానున్నాయని స్థానికులు అభిప్రాయపడ్డారు. ఇప్పటివరకు వర్షాకాలంలో రహదారి బురదమయంగా మారి ప్రయాణికులు ఇబ్బందులు పడుతున్న నేపథ్యంలో కొత్త బీటీ రోడ్డు నిర్మాణం కీలకంగా మారనుంది.
అధికారులు రహదారి పనులను నాణ్యత ప్రమాణాలు పాటిస్తూ, నిర్ణయించిన గడువులోపు పూర్తి చేసేలా చర్యలు తీసుకుంటామని హామీ ఇచ్చారు. గ్రామస్థులు కూడా పనుల పురోగతిని పర్యవేక్షిస్తూ, అవసరమైన సహకారం అందిస్తామని తెలిపారు.
భూమిపూజ అనంతరం ఇదే గ్రామానికి చెందిన పలువురు లబ్ధిదారులకు ఇంటి పొజిషన్ పత్రాలు అందజేశారు. గృహ నిర్మాణ పథకాల కింద అర్హులైన వారికి కేటాయించిన స్థలాలకు సంబంధించిన పత్రాలను అధికారులు వారి చేతుల్లో పెట్టారు. పత్రాలు అందుకున్న లబ్ధిదారులు సంతోషం వ్యక్తం చేశారు.
గ్రామంలో రహదారి నిర్మాణం, గృహ స్థలాల కేటాయింపు వంటి అభివృద్ధి కార్యక్రమాలు కొనసాగుతున్న నేపథ్యంలో ప్రజలు సంతృప్తి వ్యక్తం చేస్తూ, మరిన్ని మౌలిక వసతుల కల్పనపై ఆశాభావం వ్యక్తం చేస్తున్నారు.
