రాయలసీమ న్యూస్, తిరుపతి:
ఓబులవారిపల్లి మంగంపేట బహిరంగ సభ సందర్భంగా జూలై 2న ట్రాఫిక్ డైవర్షన్
తిరుపతి జిల్లా పరిధిలోని ఓబులవారిపల్లి మండలం, మంగంపేటలో ఆంధ్రప్రదేశ్ ముఖ్యమంత్రివర్యులు, ఉప ముఖ్యమంత్రివర్యులు మరియు కేంద్ర మంత్రులు పాల్గొనే బహిరంగ సభ నిర్వహించనున్నారు. ఈ సభకు భారీ సంఖ్యలో ప్రజలు హాజరుకానున్న నేపథ్యంలో ప్రజల భద్రత, వాహనాల రాకపోకలను సజావుగా నిర్వహించేందుకు జూలై 2, 2026న ప్రత్యేక ట్రాఫిక్ డైవర్షన్ అమలు చేయనున్నట్లు తిరుపతి జిల్లా పోలీసు శాఖ ప్రకటించింది.
ఈ ట్రాఫిక్ డైవర్షన్ జూలై 2వ తేదీ ఉదయం 7.00 గంటల నుండి మధ్యాహ్నం 3.00 గంటల వరకు అమలులో ఉండనుంది. ఈ వ్యవధిలో తిరుపతి–కడప, కడప–తిరుపతి మార్గాల్లో ప్రయాణించే వాహనాలు, అలాగే పుల్లంపేట వైపు నుండి వచ్చే వాహనాలు నిర్ణయించిన ప్రత్యామ్నాయ మార్గాల ద్వారా ప్రయాణించాల్సి ఉంటుంది.
తిరుపతి నుండి కడప వైపు వెళ్లే వాహనాలు రైల్వే కోడూరు సర్కిల్ నుండి చిట్వేలి, బెస్తపల్లి, రాజంపేట NTR సర్కిల్ మార్గంగా కడపకు వెళ్లాలని పోలీసులు సూచించారు. అదే విధంగా కడప నుండి తిరుపతి వైపు వచ్చే వాహనాలు రాజంపేట NTR సర్కిల్ నుండి బెస్తపల్లి, చిట్వేలి, రైల్వే కోడూరు మార్గంగా తిరుపతికి చేరుకోవాలి.
పుల్లంపేట వైపు నుండి వచ్చే వాహనాలు ఓబులవారిపల్లి క్రాస్ నుండి చిన్న వూరంపాడు, అనంతరం వైకోట మార్గం ద్వారా తమ గమ్యస్థానాలకు చేరుకోవాల్సి ఉంటుంది. సభ ప్రాంగణం పరిసర ప్రాంతాల్లో వాహనాల రాకపోకలను నియంత్రించేందుకు ఈ మార్గదర్శకాలు అమలులో ఉంటాయని పోలీసులు తెలిపారు.
ట్రాఫిక్ డైవర్షన్ అమలులో ఉన్న సమయంలో వాహనదారులు పై పేర్కొన్న మార్గాలను తప్పనిసరిగా పాటించాలని పోలీసు శాఖ విజ్ఞప్తి చేసింది. ప్రయాణికులు తమ ప్రయాణాన్ని ముందుగానే ప్రణాళిక చేసుకుని ప్రత్యామ్నాయ మార్గాలను వినియోగించుకోవాలని సూచించింది.
ట్రాఫిక్ విధుల్లో ఉన్న పోలీసు అధికారులు, సిబ్బంది సూచనలను వాహనదారులు తప్పనిసరిగా అనుసరించి సహకరించాలని పోలీసులు కోరారు. అత్యవసర సేవల వాహనాలకు ప్రాధాన్యత ఇవ్వబడుతుందని, వాటి రాకపోకలకు ఎలాంటి అంతరాయం కలగకుండా చర్యలు తీసుకుంటామని తెలిపారు.
ప్రజల సహకారంతోనే ట్రాఫిక్ను సజావుగా, క్రమబద్ధంగా నిర్వహించడం సాధ్యమవుతుందని తిరుపతి జిల్లా పోలీసు శాఖ పేర్కొంది. అందరూ పోలీసు శాఖకు సహకరించి అసౌకర్యాన్ని తగ్గించుకోవాలని, సూచించిన మార్గదర్శకాలను పాటించాలని విజ్ఞప్తి చేసింది.
