రాయలసీమ న్యూస్, వై.యస్.ఆర్: కడప జిల్లా లింగాల మండలం లోపట్నూతల గ్రామంలో నాలుగేళ్ల చిన్నారి అనుమానాస్పద మృతి స్థానికంగా తీవ్ర ఆగ్రహానికి దారితీసింది. ఆటపాటలతో ఇంటిని కిలకిలలతో నింపే ఆ పసిపాప చిరునవ్వు ఒక్కసారిగా శాశ్వతంగా మాయమైంది. రుత్విక (4) గురువారం సాయంత్రం నీళ్ల ట్యాంకులో మృతదేహంగా కనిపించిన ఘటనపై గ్రామస్తులు, బంధువులు అనుమానాలు వ్యక్తం చేస్తున్నారు.
పోలీసుల కథనం ప్రకారం.. లోపట్నూతల గ్రామానికి చెందిన నాగవేటి రామాచారి, సృజన దంపతులకు ఏకైక సంతానం రుత్విక. గురువారం రోజూ లాగే సాయంత్రం సుమారు 5 గంటల సమయంలో ఆడుకోవడానికి ఇంటి బయటకు వెళ్లింది. అయితే చాలా సేపటికీ తిరిగి ఇంటికి రాకపోవడంతో తల్లిదండ్రులు ఆందోళనకు గురై పరిసరాల్లో గాలించారు. ఈ క్రమంలో పక్క వీధిలోని ఓ ఇంటి ఆవరణలో ఉన్న నీళ్ల ట్యాంకులో రుత్విక మృతదేహం కనిపించింది.
సుమారు 200 లీటర్ల సామర్థ్యం గల ఆ నీళ్ల ట్యాంకు ఎత్తు దాదాపు నాలుగు అడుగుల మేర ఉండటంతో చిన్నారి స్వయంగా అందులో పడిపోవడం సాధ్యమేనా అన్న అనుమానాలు తల్లిదండ్రుల్లో వ్యక్తమయ్యాయి. తమ కుమార్తె మృతిపై అనుమానాలు ఉన్నాయని, ఇది సహజ మరణం కాదని భావిస్తున్నట్లు వారు పోలీసులకు ఫిర్యాదు చేశారు.
సూచన అందుకున్న లింగాల సీఐ శాంతిలాల్, ఎస్సై జగదీశ్వరరెడ్డి ఘటనాస్థలికి చేరుకుని పరిశీలించారు. చిన్నారి మృతిపై అనుమానాస్పద మృతి కింద కేసు నమోదు చేసి దర్యాప్తు ప్రారంభించారు. ఈ కేసులో ఓ మహిళను అనుమానితురాలిగా గుర్తించి అదుపులోకి తీసుకుని విచారణ జరుపుతున్నారు. మృతదేహాన్ని స్వాధీనం చేసుకున్న పోలీసులు పోస్టుమార్టం కోసం పంపించారు.
ఇదిలా ఉండగా, రుత్విక మృతదేహంతో తల్లిదండ్రులు, బంధువులు గురువారం రాత్రి పులివెందులలోని పార్నపల్లి రింగ్ రోడ్డు వద్ద రోడ్డుపై బైఠాయించి ధర్నాకు దిగారు. చిన్నారి బోసి నవ్వులను చిదిమిన పాపమెవరిదో గుర్తించి, దోషులను కఠినంగా శిక్షించాలని వారు డిమాండ్ చేశారు. ఈ ఘటనపై స్థానికుల్లో ఆగ్రహం వ్యక్తమైంది.
విషయం తెలుసుకున్న పులివెందుల డీఎస్పీ మురళీనాయక్ అక్కడికి చేరుకుని బాధిత కుటుంబ సభ్యులతో మాట్లాడారు. దర్యాప్తును వేగవంతం చేసి, నిజానిజాలు వెలికితీసి, బాధ్యులపై చట్టపరమైన చర్యలు తీసుకునేలా చూస్తామని బాధితులకు హామీ ఇచ్చారు. డీఎస్పీ భరోసా ఇవ్వడంతో ధర్నాను విరమించినట్టు కుటుంబ సభ్యులు తెలిపారు.
చిన్నారి అనుమానాస్పద మృతి నేపథ్యంలో లోపట్నూతల గ్రామం, పరిసర ప్రాంతాల్లో విషాద ఛాయలు అలుముకున్నాయి. రుత్విక మృతికి కారణాలేంటన్న దానిపై పోలీసులు అన్ని కోణాల్లో దర్యాప్తు కొనసాగిస్తున్నారు.
