రాయలసీమ న్యూస్, వై.యస్.ఆర్: ప్రభుత్వ సంక్షేమ పథకాలు, అభివృద్ధి కార్యక్రమాలను ప్రజల్లోకి విస్తృతంగా తీసుకెళ్లడంలో సమాచార పౌర సంబంధాల శాఖ పాత్ర అత్యంత కీలకమని ఆ శాఖ జోన్-4 ఆర్జేడీ ఎం. వెంకటేశ్వర ప్రసాద్ పేర్కొన్నారు. మంగళవారం కడపలోని జిల్లా సమాచార పౌర సంబంధాల శాఖ కార్యాలయాన్ని ఆయన అకస్మికంగా తనిఖీ చేశారు.
ఈ సందర్భంగా కార్యాలయంలోని పరిపాలనా అంశాలు, వివిధ విభాగాల పనితీరు, సిబ్బంది హాజరు వంటి అంశాలను ఆయన నిశితంగా పరిశీలించారు. అనంతరం అధికారులు, సిబ్బందితో ప్రత్యేక సమావేశం నిర్వహించి వారి విధులు, బాధ్యతలపై సమీక్ష జరిపారు.
అక్షరాస్యత పెంపు, పేదరిక నిర్మూలన, వ్యవసాయాభివృద్ధి, ఉపాధి అవకాశాల కల్పన వంటి అంశాలపై ప్రభుత్వం తీసుకుంటున్న నిర్ణయాలు, అమలు చేస్తున్న కార్యక్రమాలను ప్రజలకు సమగ్రంగా చేరవేయాల్సిన అవసరాన్ని ఆర్జేడీ ఎం. వెంకటేశ్వర ప్రసాద్ ఈ సమీక్షలో ప్రస్తావించినట్లు సమాచారం. ప్రజలతో నేరుగా మమేకమయ్యే సమాచార పౌర సంబంధాల శాఖ సిబ్బంది తమ బాధ్యతను మరింత చిత్తశుద్ధితో నిర్వర్తించాలని సూచించినట్లు తెలిసింది.
కార్యాలయానికి విచ్చేసిన ఆర్జేడీ ఎం. వెంకటేశ్వర ప్రసాద్కు ఏడీ రమేష్, డీఐఓఇ శ్రీనివాసరావు, పీఆర్వో రవికుమార్, ఏవీఎస్ నాగయ్య, సీనియర్ అసిస్టెంట్ మహబూబ్ బాషా తదితరులు పుష్పగుచ్ఛాలు అందజేసి, దుశ్శాలువాలతో ఘనంగా సత్కరించారు. అనంతరం శాఖ కార్యకలాపాలపై ఆయనతో వారు చర్చించినట్లు తెలిసింది.
ఈ కార్యక్రమంలో ఇన్ఫర్మేషన్ టెక్నీషియన్లు సదాశివయ్య, కృపాకర్, ఫొటోగ్రాఫర్ సాహెల్, టైపిస్టులు శ్రీవాణి, వర్ధిని, రికార్డ్ అసిస్టెంట్ లక్ష్మీపతి, అజ్మతుల్లా తదితరులతో పాటు ఇతర శాఖా సిబ్బంది పాల్గొన్నారు. తనిఖీ, సమీక్షా సమావేశం అనంతరం శాఖ పనితీరును మరింత మెరుగుపర్చే దిశగా సూచనలు ఇచ్చినట్లు అధికార వర్గాలు వెల్లడించాయి.
