రాయలసీమ న్యూస్, వై.యస్.ఆర్: ప్రజలు తమ స్థానిక సమస్యలను సమీప సచివాలయాల ద్వారా నేరుగా తెలియజేయాలని ప్రొద్దుటూరు మున్సిపల్ కమిషనర్ విశ్వనాథ్ సూచించారు. ఆదివారం ఆయన ఈ మేరకు వివరాలు వెల్లడించారు.
ప్రొద్దుటూరు పట్టణంలో మొత్తం 45 వార్డు సచివాలయాలు ఉన్నాయని కమిషనర్ తెలిపారు. ప్రతి సచివాలయంలో ప్రత్యేకంగా పిర్యాదుల రిజిస్టర్ను ఏర్పాటు చేసినట్లు వివరించారు. ప్రజలు తమ ప్రాంతానికి సంబంధించిన సమస్యలను ఈ రిజిస్టర్లో నమోదు చేయవచ్చని చెప్పారు.
సచివాలయాల్లో నమోదయ్యే పిర్యాదులపై సంబంధిత శాఖలు చర్యలు తీసుకునే విధంగా వ్యవస్థను రూపొందించినట్లు కమిషనర్ పేర్కొన్నారు. పిర్యాదు స్వభావాన్ని బట్టి ఆయా విభాగాలకు పంపించి, అవసరమైన చర్యలు తీసుకునేలా సూచనలు జారీ చేసినట్లు తెలిపారు.
అత్యవసర సేవలకు సంబంధించిన అంశాలపై ఆదివారాలు, ఇతర ప్రభుత్వ సెలవు రోజుల్లో కూడా పిర్యాదులు స్వీకరించేలా ఏర్పాట్లు చేసినట్లు విశ్వనాథ్ తెలిపారు. అత్యవసర పరిస్థితుల్లో ప్రజలు వెనుకాడకుండా సచివాలయాలను సంప్రదించాలని ఆయన సూచించారు.
స్థానిక సమస్యలను త్వరితగతిన పరిష్కరించేందుకు ఈ విధానం ఉపయోగపడుతుందని, ప్రజలు ఈ అవకాశాన్ని సద్వినియోగం చేసుకోవాలని కమిషనర్ విజ్ఞప్తి చేశారు. సచివాలయాల ద్వారా పిర్యాదుల స్వీకరణ, పరిష్కార ప్రక్రియ పారదర్శకంగా ఉండేలా చర్యలు కొనసాగుతున్నాయని ఆయన పేర్కొన్నారు.
