రాయలసీమ న్యూస్, అనంతపురం: అనంతపురం జిల్లా గుంతకల్లు పట్టణంలోని మోదినాబాద్ 37వ వార్డు సుంకులమ్మ గుడి ఎదురుగా ఉన్న లైన్లో మురికి కాలువ సమస్య తీవ్రంగా మారింది. కాలువ నిర్మాణాన్ని మున్సిపాలిటీ అధికారులు మధ్యలోనే ఆపివేయడంతో కాలువ నీరు నిల్వపడి స్థానికులు ఇబ్బందులు పడుతున్నారు.
వార్డు ప్రజల వివరాల ప్రకారం, కాలువ మార్గంలో ప్రైవేటు ప్లాట్లు ఉండటంతో అక్కడ యు-టర్న్ తీసుకునే అవకాశం ఉన్నప్పటికీ, మున్సిపాలిటీ అధికారులు పట్టించుకోలేదని ఆరోపిస్తున్నారు. దీంతో కాలువ నీరు ముందుకు సాగకుండా గుంతలు ఏర్పడి, మురికి నీరు నిల్వ ఉండిపోతున్నదని వారు చెబుతున్నారు.
మురికి కాలువకు అతి సమీపంలోనే కరెంటు ట్రాన్స్ఫార్మర్ ఉండటంతో, నిల్వ ఉన్న నీళ్ల వల్ల ఎప్పుడైనా పెద్ద ప్రమాదం సంభవించే అవకాశం ఉందని వార్డు ప్రజలు ఆందోళన వ్యక్తం చేస్తున్నారు. నీటిలో నిల్వవుతున్న మురికి కారణంగా పందులు, దోమలు విపరీతంగా పెరిగి, ఆరోగ్య సమస్యలు తలెత్తుతున్నాయని వారు వాపోతున్నారు.
ఈ సమస్యపై ఇప్పటికే పలుమార్లు మున్సిపాలిటీ అధికారులకు ఫిర్యాదులు చేసినట్లు, లేఖలు ఇచ్చినా ఎలాంటి చర్యలు తీసుకోలేదని వార్డు ప్రజలు పేర్కొన్నారు. కాలువ సమస్యను పట్టించుకునే నాథుడే లేడని, తమ విన్నపాలు అధికారుల దృష్టికి వెళ్లడం లేదని వారు ఆగ్రహం వ్యక్తం చేస్తున్నారు.
మురికివాడల పరిస్థితిని పరిశీలించి, ప్రజల సమస్యలను సంబంధిత అధికారుల దృష్టికి తీసుకెళ్లాలని కోరుతున్నట్లు వార్డు ప్రజలు తెలిపారు. 37వ వార్డు మురికి కాలువ సమస్యను తక్షణమే పరిష్కరించేందుకు అధికారులు ముందుకు రావాలని వారు డిమాండ్ చేస్తున్నారు.
