రాయలసీమ న్యూస్, అనంతపురం:
తాడిపత్రిలో ఉద్రిక్తత: జేసీ ప్రభాకర్ రెడ్డి వర్గీయుల దాడులు, వైసీపీ నేతకు తీవ్ర గాయాలు
అనంతపురం జిల్లా తాడిపత్రిలో రాజకీయ ఉద్రిక్తతలు కొనసాగుతున్నాయి. టీడీపీ నేత జేసీ ప్రభాకర్ రెడ్డి వర్గీయులు వైసీపీ కార్యకర్తలపై దాడులకు పాల్పడుతున్నారని ఆరోపణలు వినిపిస్తున్నాయి. గన్నేవారిపల్లి కాలనీలో జరిగిన ఘటనతో ప్రాంతంలో ఉద్రిక్త పరిస్థితులు నెలకొన్నాయి.
స్థానిక సమాచారం ప్రకారం, గన్నేవారిపల్లి కాలనీలో వైసీపీకి చెందిన కార్యకర్తల ఇళ్లపై జేసీ ప్రభాకర్ రెడ్డి అనుచరులు దాడికి తెగబడ్డారు. ఇళ్లపై రాళ్లు, కర్రలతో విచక్షణారహితంగా దాడి చేసినట్లు బాధితులు ఆరోపిస్తున్నారు. ఈ దాడుల్లో వైసీపీ నేత ప్రదీప్ రెడ్డి తీవ్రంగా గాయపడ్డారు. ఆయనను స్థానికులు సమీపంలోని ఆసుపత్రికి తరలించారు.
దాడి సమయంలో అక్కడి రహదారులు, ఇళ్ల పరిసరాలు అల్లకల్లోలంగా మారినట్లు ప్రత్యక్ష సాక్షులు చెబుతున్నారు. ఆకస్మికంగా జరిగిన ఈ దాడితో మహిళలు, పిల్లలు భయాందోళనలకు గురైనట్లు స్థానికులు పేర్కొంటున్నారు. గన్నేవారిపల్లి కాలనీ పరిసరాల్లో కొంతసేపు ఉద్రిక్త వాతావరణం నెలకొంది.
మరోవైపు, మాజీ MLA కేతిరెడ్డి పెద్దారెడ్డి నివాసంపై కూడా దాడికి పాల్పడినట్లు వైసీపీ నాయకులు ఆరోపించారు. ఆయన ఇంటి వద్దకు చేరుకున్న దుండగులు రాళ్లు రువ్వి, ఆస్తి నష్టం కలిగించినట్లు వైసీపీ శ్రేణులు ఆరోపిస్తూ పోలీసులకు ఫిర్యాదు చేశారు.
ఈ దాడుల సమయంలో రాళ్లతో విచక్షణారహితంగా దాడి చేసిన దృశ్యాలు అక్కడ ఏర్పాటు చేసిన సీసీ కెమెరాల్లో రికార్డు అయినట్లు తెలుస్తోంది. సీసీ ఫుటేజ్ ఆధారంగా పోలీసులు దర్యాప్తు ప్రారంభించారు.
సీసీ కెమెరాల్లో నమోదైన వీడియోలను పరిశీలించిన పోలీసులు, జేసీ ప్రభాకర్ రెడ్డి, ఆయన అనుచరులపై కేసు నమోదు చేశారు. ఘటనపై పూర్తి వివరాలు సేకరించేందుకు పోలీసులు అదనపు బలగాలను మోహరించారు. ప్రాంతంలో మరిన్ని అవాంఛనీయ ఘటనలు చోటుచేసుకోకుండా పోలీసులు పహారా కాస్తున్నారు.
తాడిపత్రిలో ఇటీవలి కాలంగా రాజకీయ విభేదాలు తీవ్రరూపం దాల్చుతున్న నేపథ్యంలో తాజా ఘటనపై ప్రజల్లో ఆందోళన వ్యక్తమవుతోంది. దాడులకు పాల్పడిన వారిపై కఠిన చర్యలు తీసుకోవాలని బాధితులు, స్థానికులు డిమాండ్‌ చేస్తున్నారు.
