రాయలసీమ న్యూస్, కర్నూలు: కర్నూలు: లోక్సభ ప్రతిపక్ష నేత రాహుల్ గాంధీపై ఉత్తరాఖండ్ పోలీసులు నమోదు చేసిన FIRను నిరసిస్తూ కర్నూలులో జిల్లా కాంగ్రెస్ కమిటీ ఆధ్వర్యంలో శనివారం ఆందోళన ర్యాలీ నిర్వహించారు. పార్టీ నాయకులు, కార్యకర్తలు పెద్ద సంఖ్యలో పాల్గొని నినాదాలు చేస్తూ నిరసన తెలిపారు.
జిల్లా కాంగ్రెస్ అధ్యక్షుడు క్రాంతి నాయుడు నేతృత్వంలో పార్టీ కార్యాలయం నుంచి ర్యాలీ ప్రారంభమైంది. పట్టణంలోని ప్రధాన వీధుల గుండా సాగిన ఈ ర్యాలీ స్థానికుల దృష్టిని ఆకర్షించింది. రాహుల్ గాంధీపై నమోదైన కేసును వెంటనే ఉపసంహరించుకోవాలని డిమాండ్ చేస్తూ నాయకులు నినాదాలు చేశారు.
ఈ సందర్భంగా క్రాంతి నాయుడు మాట్లాడుతూ, కులవివక్షను ప్రోత్సహించిన వారిపై చర్యలు తీసుకోకుండా, ఆ వివక్షను ప్రశ్నించిన రాహుల్ గాంధీపై కేసు పెట్టడం అన్యాయమని విమర్శించారు. ఇటువంటి చర్యలు దేశంలో ప్రతీకార రాజకీయాలకు నిదర్శనమని ఆయన అభిప్రాయపడ్డారు.
రాహుల్ గాంధీపై నమోదు చేసిన FIRను ప్రభుత్వం తక్షణమే ఉపసంహరించుకోవాలని, కులవివక్షకు పాల్పడిన వారిపై కఠిన చర్యలు తీసుకోవాలని క్రాంతి నాయుడు డిమాండ్ చేశారు. సామాజిక న్యాయం కోసం పోరాడుతున్న నాయకులపై కేసులు పెట్టడం ద్వారా ప్రజాస్వామ్య విలువలను దెబ్బతీయకూడదని ఆయన పేర్కొన్నారు.
కులవివక్షను ప్రశ్నించే స్వరాలను అణగదొక్కే ప్రయత్నాలు ఎంతమాత్రం సహించబోమని జిల్లా కాంగ్రెస్ నేతలు హెచ్చరించారు. ప్రజల మద్దతుతో పోరాటాన్ని మరింత ఉధృతం చేస్తామని తెలిపారు. ర్యాలీలో పలు మండలాల నుంచి వచ్చిన కాంగ్రెస్ నాయకులు, మహిళా కార్యకర్తలు, యువజన నాయకులు పాల్గొన్నారు.
