రాయలసీమ న్యూస్, వై.యస్.ఆర్: వైఎస్సార్ కడప జిల్లా బద్వేల్లో ప్రత్యేక ఓటరు జాబితా సమగ్ర సవరణ (SIR) కార్యక్రమాన్ని నిబంధనలకు అనుగుణంగా, పారదర్శకంగా నిర్వహిస్తున్నట్లు ఆర్డీఓ చంద్రమోహన్ తెలిపారు. బద్వేల్ ఆర్డీఓ కార్యాలయంలో ఆయన ఆధ్వర్యంలో జరిగిన విలేకరుల సమావేశంలో ఎస్ఐఆర్ ప్రక్రియ, ఇప్పటి వరకు జరిగిన పురోగతిపై కీలక వివరాలు వెల్లడించారు.
భారత ఎన్నికల సంఘం ఆదేశాల మేరకు ఎస్ఐఆర్ కార్యక్రమం కొనసాగుతోందని ఆర్డీఓ పేర్కొన్నారు. అర్హులైన ప్రతి ఓటరు పేరు ఓటరు జాబితాలో ఉండేలా చర్యలు తీసుకుంటున్నారని, అనర్హులు, మరణించిన వారు, ఇతర ప్రాంతాలకు శాశ్వతంగా మారిన వారి వివరాలను సమగ్రంగా పరిశీలించి, నిబంధనల ప్రకారం అవసరమైన సవరణలు చేపడుతున్నట్లు ఆయన వివరించారు.
బద్వేల్ నియోజకవర్గంలో బీ.ఎల్వోలు ఇంటింటికీ వెళ్లి ఎన్యుమరేషన్ ఫారాలను పంపిణీ చేస్తున్నారని, పూరించిన దరఖాస్తులను స్వీకరిస్తున్నారని ఆర్డీఓ తెలిపారు. ఇప్పటివరకు 80 వేల పైగా ఓటర్లు ఆన్లైన్ ద్వారా నమోదు ప్రక్రియలో పాల్గొన్నట్లు ఆయన వెల్లడించారు.
ఓటర్లు అవసరమైన పత్రాలతో ఫారాలను సకాలంలో సమర్పించాలని ఆర్డీఓ సూచించారు. ఎలాంటి సందేహాలు ఉన్నా సంబంధిత బీ.ఎల్వో లేదా తహసీల్దార్ కార్యాలయాన్ని సంప్రదించాలని ప్రజలను కోరారు. ఎస్ఐఆర్ ప్రక్రియపై ప్రజల్లో అపోహలు కలగకుండా అధికారులు విస్తృతంగా అవగాహన కార్యక్రమాలు నిర్వహిస్తున్నారని ఆయన తెలిపారు.
ఓటరు జాబితా సవరణను విజయవంతం చేయడానికి ప్రజలు అధికారులకు పూర్తి సహకారం అందించాలని ఆర్డీఓ విజ్ఞప్తి చేశారు. ప్రతి అర్హుడి ఓటు హక్కు సురక్షితంగా ఉండేలా ఎన్నికల విభాగం సమగ్రంగా పనిచేస్తోందని ఆయన పేర్కొన్నారు.
ఈ సమావేశంలో ఎన్నికల విభాగం అధికారులు, తహసీల్దార్లు, సంబంధిత సిబ్బంది పాల్గొన్నారు. బద్వేల్ మండలంలోని వివిధ ప్రాంతాల్లో ఎస్ఐఆర్ కార్యక్రమం అమలు, ఫీల్డ్ స్థాయిలో ఎదురవుతున్న సమస్యలు, వాటి పరిష్కారాలపై కూడా సమావేశంలో చర్చించినట్లు అధికారులు తెలిపారు.
