రాయలసీమ న్యూస్, అనంతపురం:
అనంతపురం 48వ డివిజన్లో వైసీపీకి ఎదురుదెబ్బ: కీలక నాయకులు టీడీపీలో చేరిక
అనంతపురం నగరంలో స్థానిక సంస్థల ఎన్నికల వాతావరణం వేడెక్కుతున్న నేపథ్యంలో వైసీపీకి గట్టి ఎదురుదెబ్బ తగిలింది. 48వ డివిజన్కు చెందిన పలువురు కీలక నాయకులు, కార్యకర్తలు అధికార Telugu Desam Party స్థానిక ఎమ్మెల్యే దగ్గుపాటి వెంకటేశ్వర ప్రసాద్ ఆధ్వర్యంలో పార్టీలో చేరారు. ఈ చేరికతో డివిజన్లో రాజకీయ సమీకరణాలు మారుతున్నాయి.
48వ డివిజన్ వైసీపీ ఇన్ఛార్జ్ సంగాల సురేష్, వైసీపీ సోషల్ మీడియా నగర ప్రధాన కార్యదర్శి ఇంద్రసేనారెడ్డి సహా పలువురు కార్యకర్తలు తెలుగు దేశం పార్టీ తీర్థం పుచ్చుకున్నారు. వీరితో పాటు 40కి పైగా కుటుంబాలు వైసీపీని వీడి తెలుగు దేశం పార్టీ లో చేరడం స్థానికంగా చర్చనీయాంశమైంది.
అనంతపురం అర్బన్ ఎమ్మెల్యే దగ్గుపాటి వెంకటేశ్వర ప్రసాద్ కొత్తగా పార్టీలో చేరిన నాయకులు, కార్యకర్తలకు పార్టీ కండువాలు కప్పి సాదరంగా స్వాగతం పలికారు. వీరిని తెలుగు దేశం పార్టీ లోకి ఆహ్వానిస్తూ స్థానిక రాజకీయాల్లో పార్టీ బలపడుతుందని నాయకులు అభిప్రాయపడ్డారు.
ఆదివారం సాయంత్రం 48వ డివిజన్లోని రజక నగర్లో ‘ఇంటింటికీ కూటమి ప్రభుత్వం’ కార్యక్రమాన్ని నిర్వహించారు. ఈ కార్యక్రమానికి ఎమ్మెల్యే దగ్గుపాటి ప్రసాద్ హాజరయ్యారు. ఆయనకు స్థానిక నాయకులు, కార్యకర్తలు ఘన స్వాగతం పలికారు. కొత్తగా పార్టీలో చేరిన నాయకులు కూడా ఎమ్మెల్యే వెంట కార్యక్రమంలో పాల్గొన్నారు.
కార్యక్రమం సందర్భంగా ఎమ్మెల్యే దగ్గుపాటి వెంకటేశ్వర ప్రసాద్ ఇంటింటికీ తిరుగుతూ కూటమి ప్రభుత్వం చేపట్టిన సంక్షేమ, అభివృద్ధి కార్యక్రమాలను ప్రజలకు వివరించారు. గత రెండేళ్లలో కూటమి ప్రభుత్వం అందించిన సుపరిపాలన, అభివృద్ధి పనులను చూసి వైసీపీ నాయకులు పెద్ద ఎత్తున తెలుగు దేశం పార్టీలోకి వస్తున్నారని ఆయన మీడియాకు తెలిపారు. కొత్తగా చేరిన వారికి పార్టీలో తగిన ప్రాధాన్యం కల్పిస్తామని హామీ ఇచ్చారు.
గత ప్రభుత్వం వైఫల్యమే ప్రస్తుతం జరుగుతున్న రాజకీయ మార్పులకు కారణమని ఎమ్మెల్యే దగ్గుపాటి పేర్కొన్నారు. గత ఐదేళ్లలో 48వ డివిజన్లో వైసీపీ కార్పొరేటర్ ఉన్నప్పటికీ ఎలాంటి అభివృద్ధి జరగలేదని ఆయన విమర్శించారు. కూటమి ప్రభుత్వం అధికారంలోకి వచ్చిన తర్వాత ఈ డివిజన్లో రెండు కోట్ల రూపాయలతో అభివృద్ధి పనులు పూర్తి చేసినట్లు వివరించారు.
శాంతినగర్ బోర్డు నుంచి తపోవనం వరకు నూతన రోడ్డును నిర్మించినట్లు ఎమ్మెల్యే తెలిపారు. వర్షాలు వస్తే రజక నగర్ ప్రాంతం ముంపునకు గురవడానికి ఆక్రమణలే కారణమని గుర్తించి, రెవెన్యూ అధికారులతో కలిసి కబ్జాలను తొలగించామని చెప్పారు. దీనివల్ల 5 డివిజన్లు, 14 కాలనీల ప్రజలకు ముంపు సమస్య నుంచి ఉపశమనం లభించిందని వివరించారు.
నడిమి వంక, మరువ వంక ప్రాంతాల్లో వరద ముంపును నివారించేందుకు రూ.78 కోట్ల అంచనా వ్యయంతో రక్షణ గోడలు (Protection Walls) నిర్మాణ పనులు త్వరలో ప్రారంభించనున్నట్లు ఎమ్మెల్యే దగ్గుపాటి స్పష్టం చేశారు.
ప్రజలు వైసీపీని నమ్మే పరిస్థితి లేదని, రాబోయే స్థానిక సంస్థల ఎన్నికల్లో కూటమి ప్రభుత్వం చేసిన అభివృద్ధికి ప్రజలు ఖచ్చితంగా పట్టం కడతారని ఎమ్మెల్యే దగ్గుపాటి వెంకటేశ్వర ప్రసాద్ ధీమా వ్యక్తం చేశారు.
