రాయలసీమ న్యూస్, అనంతపురం: అనంతపురం నగరంలోని టవర్ క్లాక్ సమీపంలో తెలుగుదేశం పార్టీ (టీడీపీ) నాయకులు, కార్యకర్తలు, మహిళా విభాగానికి చెందిన సభ్యులు పెద్ద సంఖ్యలో చేరి వేడుకలు నిర్వహించారు. ఆంధ్రప్రదేశ్ ముఖ్యమంత్రి నారా చంద్రబాబు నాయుడు, యువనేత నారా లోకేష్, స్థానిక ఎమ్మెల్యే దగ్గుపాటి ప్రసాద్ల చిత్రపటాలకు క్షీరాభిషేకం చేసి తమ అభిమానాన్ని వ్యక్తం చేశారు.
క్లాక్ టవర్ ప్రాంగణంలో నిర్వహించిన ఈ కార్యక్రమంలో పాల్గొన్న కార్యకర్తలు, మహిళా నాయకులు పార్టీకి, నేతలకు అనుకూలంగా నినాదాలు చేస్తూ ప్రాంతాన్ని మారుమోగించారు. తెలుగుదేశం పార్టీకి మద్దతుగా, ముఖ్యమంత్రి చంద్రబాబు నాయుడు నాయకత్వాన్ని ప్రశంసిస్తూ పలువురు నేతలు మాట్లాడారు.
తెలుగుదేశం పార్టీలో ఉండటం మాకు ఎంతో గర్వకారణం. పదవికి, కార్యకర్తకు నిజమైన అర్థం చూపిస్తున్న నాయకుడు ముఖ్యమంత్రి చంద్రబాబు నాయుడు.
కార్యక్రమంలో మాట్లాడిన టీడీపీ నాయకులు, గత వైఎస్ జగన్మోహన్ రెడ్డి పాలనలో వెనుకబడిన వర్గాలు (బీసీ) పూర్తిగా అనగదొక్కబడ్డాయని విమర్శించారు. బీసీ వర్గాలకు, మహిళలకు రిజర్వేషన్లు కేటాయించి, వారికి రాజకీయంగా, సామాజికంగా ప్రాధాన్యత కల్పించిన ఏకైక నాయకుడు నారా చంద్రబాబు నాయుడే అని వారు పేర్కొన్నారు.
బీసీలకు, మహిళలకు అవకాశాలు కల్పించడంలో తెలుగుదేశం పార్టీ తీసుకున్న నిర్ణయాలు రాష్ట్ర రాజకీయాల్లో కీలక మలుపుగా నిలిచాయని నేతలు అభిప్రాయపడ్డారు. పార్టీ కార్యకర్తలకు సరైన గుర్తింపు ఇవ్వడంలో ప్రస్తుత ప్రభుత్వం చూపుతున్న తీరు తమకు ఉత్సాహాన్ని కలిగిస్తోందని వారు తెలిపారు.
అనంతపురం నియోజకవర్గానికి చెందిన పలువురు కీలక టీడీపీ నాయకులు, స్థానిక కార్యకర్తలు, పెద్ద సంఖ్యలో మహిళలు ఈ కార్యక్రమంలో ఉత్సాహంగా పాల్గొన్నారు. క్లాక్ టవర్ పరిసర ప్రాంతం పసుపు కండువాలతో, పార్టీ జెండాలతో కళకళలాడింది. కార్యక్రమం ముగిసిన అనంతరం నేతలు, కార్యకర్తలు పరస్పరం శుభాకాంక్షలు తెలుపుకుంటూ, పార్టీ విజయాల కోసం కృషి కొనసాగించాలని సంకల్పం వ్యక్తం చేశారు.
