రాయలసీమ న్యూస్, శ్రీ సత్యసాయి: శ్రీ సత్యసాయి జిల్లా కదిరి ప్రాంతీయ వైద్యశాల ఆవరణలో బుధవారం దారుణ హత్య జరిగింది. ముదిగుబ్బ మండలం ఈదులపల్లికి చెందిన గంగరాజు తన భార్య సునీత (32)ను ఆసుపత్రి ఆవరణలో గొంతు కోసి హత్య చేసిన ఘటన స్థానికంగా కలకలం రేపింది.
పోలీసుల కథనం ప్రకారం, దంపతుల మధ్య జరిగిన గొడవ తీవ్రరూపం దాల్చింది. ఈ గొడవలో గంగరాజు తన భార్య సునీతను తీవ్రంగా కొట్టినట్లు పోలీసులు తెలిపారు. దాడిలో గాయపడిన సునీతను కుటుంబ సభ్యులు కదిరి ప్రభుత్వ ఆసుపత్రికి తరలించారు.
కదిరి ప్రాంతీయ వైద్యశాలలో మహిళా వార్డులో చికిత్స పొందుతున్న సునీతను మెరుగైన చికిత్స కోసం ప్రైవేట్ ఆసుపత్రికి తీసుకెళ్దామని గంగరాజు కుటుంబ సభ్యులకు, భార్యకు చెప్పినట్లు పోలీసులు వెల్లడించారు. ఈ సందర్భంగా మహిళా వార్డు నుంచి సునీతను బయటకు తీసుకొచ్చిన గంగరాజు, తన వద్ద ఉన్న కత్తితో ఆమె గొంతు కోసి అక్కడికక్కడే హత్య చేసినట్లు విచారణలో బయటపడింది.
ఆసుపత్రి ఆవరణలో జరిగిన ఈ ఘటనతో అక్కడి రోగులు, వారి బంధువులు భయాందోళనకు గురయ్యారు. సమాచారం అందుకున్న కదిరి పట్టణ సీఐ నారాయణరెడ్డి తన సిబ్బందితో వెంటనే ఆసుపత్రి ప్రాంగణానికి చేరుకున్నారు. అక్కడే ఉన్న గంగరాజును పోలీసులు అదుపులోకి తీసుకుని పోలీస్ స్టేషన్కు తరలించారు.
హత్యకు ఉపయోగించిన కత్తిని పోలీసులు స్వాధీనం చేసుకున్నారు. సంఘటనా స్థలాన్ని పరిశీలించిన పోలీసులు, ఆసుపత్రి ఆవరణలోని పరిస్థితులను నమోదు చేసి కేసు దర్యాప్తు ప్రారంభించారు. దంపతుల మధ్య గొడవకు గల కారణాలు, హత్యకు దారితీసిన పరిస్థితులపై పోలీసులు విచారణ కొనసాగిస్తున్నారు.
ఈదులపల్లి గ్రామానికి చెందిన సునీత హత్య వార్త గ్రామంలో విషాదాన్ని నింపింది. కుటుంబ కలహాలు ఇంతటి దారుణానికి దారి తీసిన ఘటనపై స్థానికులు ఆగ్రహం వ్యక్తం చేస్తున్నారు. గంగరాజుపై సంబంధిత సెక్షన్ల కింద కేసు నమోదు చేసి, మరింత దర్యాప్తు చేపట్టనున్నట్లు పోలీసులు పేర్కొన్నారు.
