రాయలసీమ న్యూస్, శ్రీ సత్యసాయి: మండల పరిధిలోని 44వ నంబరు జాతీయ రహదారి కొడికొండ చెక్పోస్ట్ సమీపంలో జరిగిన రోడ్డు ప్రమాదంలో ఒకరు మృతి చెందగా, మరో వ్యక్తి తీవ్రంగా గాయపడ్డాడు. ఈ ఘటన ఆదివారం సాయంత్రం చోటుచేసుకుంది.
ఎస్ఐ శ్రీధర్ అందించిన వివరాల ప్రకారం, సోమందేపల్లికి చెందిన నరసింహమూర్తి (55) వెల్డింగ్ పనులు చేస్తూ జీవనం సాగిస్తున్నాడు. ఆదివారం సాయంత్రం చెక్పోస్ట్ వైపు నుంచి సోమందేపల్లి దిశగా ద్విచక్ర వాహనంపై ప్రయాణిస్తుండగా, వెనుక నుంచి వేగంగా వచ్చిన ఐచర్ వాహనం అతని బైక్ను ఢీకొట్టింది.
ఘటనలో నరసింహమూర్తి అక్కడికక్కడే మృతి చెందాడు. ప్రమాద సమయంలో అతనితో పాటు ద్విచక్ర వాహనంలో ప్రయాణిస్తున్న చాంద్బాషా అనే వ్యక్తి తీవ్రంగా గాయపడ్డాడు. స్థానికులు సమాచారం అందించడంతో పోలీసు సిబ్బంది సంఘటనా స్థలానికి చేరుకుని పరిస్థితిని పరిశీలించారు.
గాయపడిన చాంద్బాషాను తక్షణమే హిందూపురం ప్రభుత్వాస్పత్రికి తరలించి చికిత్స అందిస్తున్నారు. వైద్యుల పర్యవేక్షణలో ఆయనకు చికిత్స కొనసాగుతోంది. మృతుడు నరసింహమూర్తికి భార్య, ఇద్దరు పిల్లలు ఉన్నట్లు పోలీసులు తెలిపారు.
ప్రమాదానికి కారణమైన ఐచర్ వాహనాన్ని పోలీసులు స్వాధీనం చేసుకున్నారు. సంఘటనా స్థలంలో పంచనామా నిర్వహించి, మృతదేహాన్ని పోస్టుమార్టం నిమిత్తం ప్రభుత్వాస్పత్రికి తరలించారు. ఈ ఘటనపై కేసు నమోదు చేసి దర్యాప్తు ప్రారంభించినట్లు ఎస్ఐ శ్రీధర్ పేర్కొన్నారు.
