రాయలసీమ న్యూస్, తెలంగాణ డెస్క్:
ఇరవై ఏళ్ల రాజకీయ ప్రయాణం..
జీవితంలో ప్రత్యేక అధ్యాయం: సీఎం రేవంత్రెడ్డి
హైదరాబాద్: తన ఇరవై ఏళ్ల రాజకీయ ప్రస్థానం జీవితంలో ప్రత్యేక అధ్యాయమని తెలంగాణ ముఖ్యమంత్రి రేవంత్రెడ్డి అభివర్ణించారు. రెండు దశాబ్దాల రాజకీయ ప్రయాణంపై ఆయన శుక్రవారం సామాజిక మాధ్యమ వేదిక ఎక్స్లో భావోద్వేగపూర్వకంగా ఒక పోస్ట్ చేశారు.
ఈ ఇరవై వసంతాల రాజకీయ ప్రయాణంలో ఎన్నో విజయాలు, మరెన్నో సవాళ్లు ఎదురైనా, ప్రజా సమస్యల పరిష్కారానికే నిరంతర పోరాటం కొనసాగించానని ఆయన పేర్కొన్నారు. అధికారంలో ఉన్నా, ప్రతిపక్షంలో ఉన్నా ప్రజలతో తన అనుబంధం ఎప్పుడూ కొనసాగిందని తెలిపారు.
మిడ్జిల్ ప్రాంతంలో సాధారణ రాజకీయ కార్యకర్తగా ప్రారంభమైన తన రాజకీయ జీవితం, ఇవాళ రాష్ట్ర ముఖ్యమంత్రిగా, ప్రజల గుండెల్లో ‘రేవంతన్న’గా నిలిచే స్థాయికి చేరుకోవడం వెనుక ప్రజల విశ్వాసమే ప్రధాన కారణమని రేవంత్రెడ్డి అభిప్రాయపడ్డారు.
ఈ రెండు దశాబ్దాల ప్రజా జీవితం తనకు ఒక మధుర జ్ఞాపకమని ఆయన పేర్కొన్నారు. లక్షల అక్షరాలతో రాసినా, కోట్ల పదాలతో చెప్పినా ఈ ఇరవై ఏళ్ల రాజకీయ ప్రయాణాన్ని పూర్తిగా వర్ణించలేమని ఆయన భావోద్వేగంగా వ్యాఖ్యానించారు.
ప్రతి సందర్భంలో, ప్రతి సంఘటనలో, ప్రతి సంఘర్షణలో తనతో పాటు నడిచిన ప్రజలు, పార్టీ కార్యకర్తలు, ఆత్మీయులు, మిత్రులు, శ్రేయోభిలాషులందరికీ హృదయపూర్వక కృతజ్ఞతలు తెలిపారు. వారి ప్రోత్సాహం, నమ్మకం, అండదండలే తన రాజకీయ జీవితానికి బలమని ఆయన పేర్కొన్నారు.
ఇదే స్ఫూర్తితో ప్రజలకు మరింత సేవ చేయాలనే సంకల్పంతో ముందుకు సాగుతానని రేవంత్రెడ్డి స్పష్టం చేశారు. తెలంగాణ పునర్నిర్మాణంలో శ్రామికుడిగా, ప్రజల ఆకాంక్షలను నెరవేర్చే సేవకుడిగా తన బాధ్యతను నిర్వర్తించేందుకు కట్టుబడి ఉన్నట్లు హామీ ఇచ్చారు.
ముఖ్యమంత్రిగా మాత్రమే కాకుండా, ‘రేవంతన్న’గా ప్రజల హృదయాల్లో తన స్థానాన్ని మరింత సుస్థిరం చేసుకోవాలని లక్ష్యంగా పెట్టుకున్నట్లు ఆయన పేర్కొన్నారు. ప్రజల ఆశలు, ఆకాంక్షలకు అనుగుణంగా పాలన సాగిస్తూ, రాష్ట్ర అభివృద్ధి, ప్రజల సంక్షేమం కోసం నిరంతరం కృషి చేస్తానని రేవంత్రెడ్డి తన పోస్ట్లో స్పష్టం చేశారు.
