రాయలసీమ న్యూస్, వై.యస్.ఆర్: వైఎస్సార్ కడప జిల్లా పులివెందులలో వైద్యం వికటించిందని కుటుంబసభ్యులు ఆరోపిస్తున్న ఘటనలో 11 ఏళ్ల బాలిక మృతి చెందింది. ఈ సంఘటనతో పట్టణంలో విషాద ఛాయలు అలుముకున్నాయి. బాధితులు వైద్యుల నిర్లక్ష్యమే ప్రాణనష్టం కారణమని ఆరోపిస్తూ ఆందోళనకు దిగారు.
పులివెందుల పట్టణంలోని క్రిస్టియన్ లైన్ వీధికి చెందిన ప్రేమ్కుమార్, తులసీరెడ్డి దంపతుల కుమార్తె మోక్షిత (11) స్థానికంగా ఉన్న ఓ ప్రైవేటు పాఠశాలలో ఆరో తరగతి చదువుతోంది. గురువారం ఆమెకు అకస్మాత్తుగా కడుపునొప్పి రావడంతో తల్లిదండ్రులు పట్టణంలోని ఓ ప్రైవేటు ఆసుపత్రికి తీసుకెళ్లారు.
అక్కడ వైద్యులు స్కానింగ్ నిర్వహించి, మోక్షిత కడుపులో ఇన్ఫెక్షన్ ఉన్నట్లు కుటుంబసభ్యులకు తెలిపారు. అవసరమైన చికిత్స కోసం వేరే ఆసుపత్రికి వెళ్లాలని సూచించారు. దీంతో తల్లిదండ్రులు ఆమెను పట్టణంలోని మరో ప్రైవేటు ఆసుపత్రికి తరలించారు.
ఆ ఆసుపత్రిలో విధులు నిర్వహిస్తున్న వైద్యురాలు మోక్షితను పరీక్షించి ఓ ఇంజెక్షన్ ఇచ్చినట్లు కుటుంబసభ్యులు తెలిపారు. ఇంజెక్షన్ ఇచ్చిన కొద్దిసేపటికే బాలిక అపస్మారక స్థితిలోకి చేరినట్లు వారు పేర్కొన్నారు. పరిస్థితి విషమించడంతో వైద్యురాలు వెంటనే కడపలోని ఆసుపత్రికి తీసుకెళ్లాలని సూచించినట్లు సమాచారం.
దీంతో కుటుంబసభ్యులు మోక్షితను కడపలోని ఓ ప్రైవేటు ఆసుపత్రికి తరలించారు. అక్కడి వైద్యులు చికిత్స అందించినప్పటికీ, సుమారు రెండు గంటల తర్వాత మోక్షిత మరణించినట్లు నిర్ధారించారు. వైద్యం వికటించడంతోనే బాలిక ప్రాణాలు కోల్పోయిందని కుటుంబసభ్యులు ఆరోపిస్తున్నారు.
ఈ నేపథ్యంలో ఇంజెక్షన్ ఇచ్చిన వైద్యురాలి ఆసుపత్రి ఎదుట బాధిత కుటుంబసభ్యులు, బంధువులు బైఠాయించి ఆందోళన చేపట్టారు. ఆసుపత్రి వద్ద ఉద్రిక్త పరిస్థితి నెలకొంది. విషయం తెలుసుకున్న పులివెందుల అర్బన్ సీఐ శ్రీరామ్ సంఘటనా స్థలానికి చేరుకుని పరిస్థితిని సమీక్షించారు.
బాధిత కుటుంబసభ్యులతో మాట్లాడిన సీఐ, ఘటనపై దర్యాప్తు చేసి, న్యాయం జరిగేలా చర్యలు తీసుకుంటామని హామీ ఇచ్చారు. అనంతరం కుటుంబసభ్యులు ఆందోళన విరమించారు. ఈ ఘటనపై స్థానికంగా చర్చనీయాంశంగా మారింది.
బాధిత కుటుంబానికి మద్దతుగా తెదేపా నేత టి. మధుసూదన్రెడ్డి ఆసుపత్రి వద్దకు చేరుకుని వారిని పరామర్శించారు. వైద్య నిర్లక్ష్యంపై అధికారుల దృష్టికి విషయం తీసుకెళ్లి, బాధ్యులపై చర్యలు తీసుకోవాలని ఆయన డిమాండ్ చేసినట్లు సమాచారం.
