రాయలసీమ న్యూస్, శ్రీ సత్యసాయి: సత్య సాయి జిల్లా:- కదిరి:- ప్రజాశాంతి, శాంతిభద్రతలకు విఘాతం కలిగించే విధంగా వరుస నేరాలకు పాల్పడుతున్న రౌడీ షీటర్ షేక్ ముజాహిద్ @ ముజ్జు (21)పై ఆంధ్రప్రదేశ్ డేంజరస్ యాక్టివిటీస్ చట్టం, 1986 ప్రకారం పి.డి. యాక్ట్ కింద నిర్బంధ ఉత్తర్వులు జారీ అయ్యాయి. అనంతరం అతడిని కడప కేంద్ర కారాగారానికి తరలించారు.

గత రెండు సంవత్సరాలుగా, ముఖ్యంగా ఇటీవలి మూడు నెలల్లో నిందితుడిపై హత్యాయత్నం, గాయపరచడం, బెదిరింపులు, బలవంతపు వసూళ్లు తదితర నేరాలకు సంబంధించి మొత్తం ఏడు క్రిమినల్ కేసులు నమోదయ్యాయని పోలీసులు తెలిపారు. అరెస్టు, రిమాండ్, బెయిల్, కౌన్సెలింగ్ వంటి చట్టపరమైన మరియు నిరోధక చర్యలు తీసుకున్నప్పటికీ నిందితుడు తన నేర కార్యకలాపాలను కొనసాగించిన నేపథ్యంలో పి.డి. యాక్ట్ కింద చర్యలు చేపట్టినట్లు పేర్కొన్నారు.

నిందితుడి వివరాల ప్రకారం అతని పేరు షేక్ ముజాహిద్ @ ముజ్జు, వయస్సు 21 సంవత్సరాలు. తండ్రి షేక్ జాఫర్. వృత్తి డ్రైవర్. నివాసం శ్రీ సత్యసాయి జిల్లా కదిరి టౌన్‌లోని గాంధీనగర్ ప్రాంతం. ఈ పరిధిలో అతను పునరావృత నేరప్రవృత్తితో ప్రజల్లో భయాందోళనలు సృష్టిస్తున్నాడని పోలీసు అధికారులు వివరించారు.

ఆంధ్రప్రదేశ్ డేంజరస్ యాక్టివిటీస్ చట్టం, 1986లోని సంబంధిత నిబంధనల ప్రకారం నిందితుడిని “గూండా”గా పరిగణించి నిర్బంధ చర్యలు చేపట్టారు. జిల్లా పోలీస్ శాఖ సమర్పించిన ప్రతిపాదనలను పరిశీలించిన అనంతరం శ్రీ సత్యసాయి జిల్లా కలెక్టర్ & జిల్లా మేజిస్ట్రేట్ ఏ. శ్యామ్ ప్రసాద్, IAS నిర్బంధ ఉత్తర్వులు జారీ చేశారు. ఈ ఉత్తర్వుల మేరకు నిందితుడిని కడప కేంద్ర కారాగారంలో నిర్బంధించారు.

ఈ కేసు వివరాలను కదిరి డీఎస్పీ శివన్నారాయణ స్వామి, సీఐ వెంకటేశ్వర్లతో కలిసి మీడియాకు వెల్లడించారు. జిల్లా ఎస్పీ ఎస్. సతీష్ కుమార్, IPS ఆదేశాల మేరకు పి.డి. యాక్ట్ అమలు సహా అన్ని చట్టపరమైన చర్యలు చేపట్టినట్లు వారు తెలిపారు.

కదిరి టౌన్ పరిధిలో ఇదే తరహా నేరాలకు పాల్పడుతున్న మరికొందరిని కూడా పోలీసులు గుర్తించినట్లు అధికారులు పేర్కొన్నారు. వారి కార్యకలాపాలపై నిఘా కొనసాగిస్తూ, అవసరమైన చట్టపరమైన చర్యలకు సంబంధించి ప్రతిపాదనలు పంపనున్నట్లు చెప్పారు. ప్రజాశాంతి పరిరక్షణ, శాంతిభద్రతల నిర్వహణ లక్ష్యంగా నిఘా వ్యవస్థను మరింత బలోపేతం చేస్తున్నట్లు పోలీసు వర్గాలు తెలియజేశాయి.

పదేపదే నేరాలకు పాల్పడితే పి.డి. యాక్ట్ ప్రయోగించడంతో పాటు, పోలీస్ శాఖ పరంగా చట్టబద్ధమైన కఠిన చర్యలు తీసుకుంటాం.

శ్రీ సత్యసాయి జిల్లా పోలీస్ శాఖ ప్రజల భద్రతను ప్రధాన బాధ్యతగా తీసుకుని, వరుస నేరాలకు పాల్పడే వ్యక్తులపై కఠిన చర్యలు కొనసాగిస్తామని స్పష్టం చేసింది.