రాయలసీమ న్యూస్, శ్రీ సత్యసాయి: శ్రీ సత్య సాయి జిల్లా పెనుకొండ చారిత్రక వైభవాన్ని ఆస్వాదించేందుకు, కొండ మలుపుల్లో అరుదైన అనుభూతులను సొంతం చేసుకునేందుకు దేశంలోని వివిధ ప్రాంతాల నుంచి యాత్రికులు తరలివస్తున్నారు. అయితే కొండపై కనీస సౌకర్యాలు లేకపోవడం వల్ల పర్యాటకులు తీవ్ర అసౌకర్యానికి గురవుతున్నారు. ఈ పరిస్థితులను సరిదిద్దాల్సిన అటవీశాఖ, సౌకర్యాల ఏర్పాటు కంటే టోల్ వసూలుపైనే దృష్టి పెట్టిందని సందర్శకులు ఆక్షేపిస్తున్నారు.
విజయనగర సామ్రాజ్యాధీశుడు శ్రీకృష్ణ దేవరాయల వేసవి విడిది, రెండో రాజధానిగా చరిత్రలో నిలిచిన పెనుకొండ నగరం పర్యాటక కేంద్రంగా పేరుపొందింది. ఇక్కడ నిర్మించిన ఘాట్ రోడ్డు తిరుమల ఘాట్ రోడ్డును తలపించేలా వంకర మలుపులతో ఉండటంతో, ఈ మార్గంలో ప్రయాణాన్ని ఆస్వాదించేందుకు, కొండ పైనుంచి సూర్యోదయాన్ని వీక్షించేందుకు వందలాది మంది టెకీలు బెంగళూరు, చెన్నై నగరాల నుంచి తరలివస్తున్నారు. వారాంతాల్లో ఈ సంఖ్య మరింత పెరుగుతోంది.
కొండపైకి వాహనాల్లో వెళ్లే ప్రతి పర్యాటకుడి నుంచి అటవీశాఖ టోల్ వసూలు చేస్తోంది. 2026 మే 6 నుంచి ద్విచక్ర వాహనానికి రూ.20, కారుకు రూ.50, ఆటోకు రూ.30, బస్సుకు రూ.100 చొప్పున వసూలు చేస్తున్నారు. శని, ఆదివారాల్లో 350–400 వాహనాలు, మిగిలిన రోజుల్లో సుమారు 100 వాహనాలు ఈ మార్గంలో ప్రయాణిస్తున్నాయి. ఈ మేరకు టోల్ వసూలు జరుగుతున్నప్పటికీ, కొండపై ఆహారం, తాగునీరు వంటి కనీస సౌకర్యాలు లేకపోవడం పర్యాటకులను ఇబ్బందులకు గురిచేస్తోంది.
అటవీశాఖ కొండపై నగరవనం, ఫుడ్ కోర్టు నిర్మించినప్పటికీ, ఫుడ్ కోర్టు ఇప్పటికీ ప్రారంభం కాకపోవడం సమస్యగా మారింది. తాగునీరు, ఆహారం లభించకపోవడంతో కుటుంబాలతో, చిన్నారులతో వచ్చే సందర్శకులు తీవ్ర అసంతృప్తి వ్యక్తం చేస్తున్నారు. టోల్ వసూలు చేస్తూ, సౌకర్యాల విషయంలో నిర్లక్ష్యం వహించడం తగదని వారు అభిప్రాయపడుతున్నారు.
ఈ నేపథ్యంలో అటవీశాఖ అధికారులు సౌకర్యాల ఏర్పాటు దిశగా చర్యలు ప్రారంభించినట్లు తెలిపారు. కొండపై తాగునీటి సమస్యను పరిష్కరించేందుకు ప్రయత్నాలు చేస్తున్నామని పేర్కొన్నారు.
ఇటీవల కొండపై బోరు బావి తవ్వించినా.. సరిపడా నీళ్లు లభించలేదు. నగరవనం, ఫుడ్ కోర్టు నిర్మాణం పూర్తయింది. ఉన్నతాధికారుల దృష్టికి తీసుకువెళ్లి.. నీటి సౌకర్యంతో పాటు త్వరలోనే ఫుడ్ కోర్టు ప్రారంభించేలా చర్యలు చేపడతాం
అని ఎఫ్ఆర్వో శ్రీనివాసులురెడ్డి తెలిపారు.
పెనుకొండ చారిత్రక ప్రాధాన్యాన్ని దృష్టిలో ఉంచుకుని, ఇక్కడి పర్యాటక వసతులను మెరుగుపరచాల్సిన అవసరం ఉందని స్థానికులు, సందర్శకులు భావిస్తున్నారు. టోల్ వసూలుతో పాటు సౌకర్యాల అభివృద్ధి కూడా సమాంతరంగా జరిగితేనే పర్యాటక రంగం మరింత అభివృద్ధి చెందుతుందని వారు సూచిస్తున్నారు.
