రాయలసీమ న్యూస్, అనంతపురం: అనంతపురం జిల్లా: దాయాదుల మధ్య ఆస్తి పంపకాల వివాదం నేపథ్యంలో జరిగిన ప్రతీకార దాడిలో వృద్ధుడి హత్యకు కారణమైన నిందితులను ఉరవకొండ పోలీసులు అరెస్ట్ చేశారు. గుంతకల్లు డీఎస్పీ శ్రీనివాస్, ఉరవకొండ సీఐ మహానంది శనివారం వివరాలు వెల్లడించారు.
పోలీసుల సమాచారం ప్రకారం, విడపనకల్లు మండలం హావలిగిలో దాయాదుల ఆస్తుల పంపకాలపై కొంతకాలంగా విభేదాలు కొనసాగుతున్నాయి. ఈ క్రమంలో ఈ నెల 2న చిగురుపాటి ఆంజనేయ (80)పై ఏడుగురు వ్యక్తులు దాడికి పాల్పడ్డారు. తీవ్రంగా గాయపడిన ఆంజనేయను కుటుంబ సభ్యులు ఆసుపత్రికి తరలించి చికిత్స అందించారు.
అయితే గాయాల తీవ్రతకు చికిత్స పొందుతూ ఈ నెల 7న ఆంజనేయ మృతి చెందాడు. ఈ ఘటనతో గ్రామంలో ఉద్రిక్త పరిస్థితులు నెలకొన్నాయి. కేసు నమోదు చేసిన ఉరవకొండ పోలీసులు దర్యాప్తు చేపట్టి, దాడిలో పాల్గొన్న ఏడుగురు నిందితులను గుర్తించారు.
నిందితుల అరెస్టుతో కేసు దర్యాప్తులో కీలక పురోగతి సాధించినట్లు పోలీసులు తెలిపారు. అరెస్టు చేసిన వారిని కోర్టులో హాజరు పరిచి, న్యాయస్థానం ఆదేశాల మేరకు రిమాండ్కు తరలించారు. ఆస్తి వివాదాలు హింసాత్మక ఘటనలకు దారితీసే అవకాశం ఉన్నందున, ఇలాంటి సమస్యలను చట్టపరంగా పరిష్కరించుకోవాలని పోలీసులు సూచించారు.
గ్రామంలో మళ్లీ ఇలాంటి ఘటనలు చోటుచేసుకోకుండా అదనపు పోలీసు బలగాలను మోహరించినట్లు, పరిస్థితిని పూర్తిగా అదుపులోకి తీసుకున్నట్లు అధికారులు పేర్కొన్నారు. హావలిగిలో ఆస్తి పంపకాలపై ఉన్న ఇతర వివాదాలపై కూడా స్థానిక పోలీసు అధికారులు పర్యవేక్షణ కొనసాగిస్తున్నారు.
