రాయలసీమ న్యూస్, చిత్తూరు: చిత్తూరు :ఇంటి నుంచి వెళ్లి వస్తామని చెప్పి బయలుదేరిన అన్నాచెల్లెళ్లు రోడ్డు ప్రమాదంలో మృత్యువాతపడ్డారు. వి.కోట మండలంలో ఆంధ్రప్రదేశ్–తమిళనాడు సరిహద్దు ప్రాంతంలో ఆదివారం ఈ విషాద ఘటన చోటుచేసుకుంది.
పోలీసుల సమాచారం ప్రకారం.. కర్ణాటకలోని కేజీఎఫ్ సమీపంలో పారాండ్లహళ్లికి చెందిన లేటు శ్రీధర్ కుటుంబం ఈ ప్రమాదంతో శిథిలమైంది. శ్రీధర్కు బాలాజీ (21), మహశ్రీ (11) సంతానం. ఇటీవలే శ్రీధర్ మరణించగా, కుటుంబం తీవ్ర విషాదంలో మగ్గుతోంది. ఈ క్రమంలో అన్నాచెల్లెళ్లు గుడియాత్తం సమీపంలోని వడత్తూరులో ఉన్న అమ్మమ్మ ఇంటికి వెళ్లారు.
అక్కడి నుంచి సొంతూరు వెళ్లేందుకు బాలాజీ ద్విచక్ర వాహనంపై చెల్లెలు మహశ్రీతో కలిసి ప్రయాణం ప్రారంభించారు. నాయకనేరి ఘాట్ రోడ్డులో కంటైనర్ లారీ వెనుక ద్విచక్ర వాహనంపై వెళ్తుండగా, తోళ్ల లోడుతో వెళ్తున్న మరో లారీ వెనుక నుంచి ఢీకొట్టింది. ఢీకొట్టిన ప్రభావంతో ద్విచక్ర వాహనం రెండు లారీల మధ్య ఇరుక్కుపోయి పూర్తిగా నుజ్జునుజ్జు అయింది.
స్థానికులు ప్రమాదాన్ని గమనించి వెంటనే పోలీసులకు సమాచారం అందించారు. వి.కోట పోలీసులు ఘటనా స్థలానికి చేరుకుని, తీవ్రంగా దెబ్బతిన్న ద్విచక్ర వాహనాన్ని తొలగించి, అందులో చిక్కుకున్న బాలాజీ, మహశ్రీ మృతదేహాలను వెలికితీశారు. మృతదేహాలను పోస్టుమార్టం కోసం సమీప ప్రభుత్వ ఆసుపత్రికి తరలించారు.
ఘటనపై వి.కోట పోలీసు స్టేషన్లో కేసు నమోదు చేసి దర్యాప్తు ప్రారంభించినట్లు పోలీసులు తెలిపారు. లారీ డ్రైవర్ల నిర్లక్ష్యమే ప్రమాదానికి కారణమై ఉండొచ్చని ప్రాథమికంగా భావిస్తున్నట్లు పేర్కొన్నారు. ప్రమాదం జరిగిన నాయకనేరి ఘాట్ రోడ్డులో భారీ వాహనాల రాకపోకలు ఎక్కువగా ఉండటంతో, ఇలాంటి ఘటనలు పునరావృతం కాకుండా ట్రాఫిక్ నియంత్రణ చర్యలను బలోపేతం చేయాల్సిన అవసరం ఉందని స్థానికులు అభిప్రాయపడుతున్నారు.
ఒకే కుటుంబానికి చెందిన ఇద్దరు పిల్లలు ఇలా ఒక్కసారిగా ప్రాణాలు కోల్పోవడంతో పారాండ్లహళ్లి, వడత్తూరు ప్రాంతాల్లో విషాదం నెలకొంది. ఇటీవల తండ్రిని కోల్పోయిన కుటుంబం ఇప్పుడు పిల్లలను కూడా కోల్పోవడం మరింత మానసిక ఆవేదనకు గురిచేస్తోంది. ప్రమాదం జరిగిన విషయం తెలిసిన బంధువులు, గ్రామస్థులు ఆసుపత్రికి చేరుకుని కన్నీటి పర్యంతమవుతున్నారు.
